Шефот на дипломатијата вели дека надежните се оти преговарачката рамка ќе биде усвоена на Европскиот совет закажан за јуни. Одложување на преговорите, вели тој, ќе биде сериозна геостратешка грешка
Северна Македонија стана лакмусов тест за кредибилитетот на процесот на проширување на Европската унија, и затоа преговорите за нејзино пристапување во Унијата не смеат и понатаму да се одложуваат, истакнува министерот за надворешни работи, Бујар Османи во интервју за шпанската новинска агенција ЕФЕ и „Еуроактив“.
„Одложувањето на почетокот на преговорите, кои ја засегаат и Албанија, би било сериозна геостратешка грешка бидејќи ќе има последици за целиот балкански регион“,
нагласува Османи.
Напредокот на Северна Македонија во прифаќањето на различностите, помирувањето и односите со соседните земји, според него, треба да се гледа како репер за регионот и да биде награден.
Поради тоа, вели Османи, многу е важно ЕУ да најде начин да ги започне пристапните преговори без понатамошно одложување.
Во однос на бугарската блокада, тој е уверен дека по парламентарните избори во Бугарија во април ќе се отвори патот за порационален пристап што ќе овозможи решавање на билатералните разлики.
Шефот на дипломатијата нагласува и дека сите земји-членки на ЕУ, со исклучок на Бугарија, го поддржуваат текстот предложен од Европската комисија за преговарачката рамка со која формално ќе се воспостави пристапниот дијалог.
„Важно е текстот на преговарачката рамка да биде усвоен што е можно побрзо, и се надеваме дека тоа ќе се случи на Европскиот совет закажан за јуни“,
вели Османи во интервјуто дадено откако претходно беше во посета на Мадрид каде се сретна со шпанската министерка за надворешни работи Аранча Гонзалес Лаја.
На средбата Гонзалес Лаја го уверила дека Шпанија ќе ја поддржува ѝ помага Северна Македонија во процесот на преговори за прием во ЕУ.