Шведска има принципиелен став дека одлуките на Советот на ЕУ од март 2020 година, во однос на отворањето на пристапните преговори со нашата држава, треба да се спроведат што е можно поскоро, рече министерот по разговорот со колешката од Шведска

Министерот за надворешни работи Бујар Османи денеска разговараше со шефицата на шведската дипломатија Ан Линде, на која ѝ се заблагодари на поддршката за евроинтеграциите на Северна Македонија, а ја искажа македонската поддршка за шведското членство во НАТО.
„Благодарност за шведската континуирана посветеност на процесот на проширување на ЕУ и процесот на интеграција на Северна Македонија во ЕУ. Шведска има принципиелен став дека одлуките на Советот на ЕУ од март 2020 година, во однос на отворањето на пристапните преговори со нашата држава, треба да се спроведат што е можно поскоро“,
рече Османи по разговорот.
Двајцата соговорници, велат од МНР, разговараа и за зајакнувањето на безбедноста во Европа, при што министерот ја истакнал нашата силната поддршка за членството на Шведска во НАТО.
„Османи истакна дека Северна Македонија, како најнова членка на НАТО, е силен поборник за политиката на отворени врати на Алијансата, заснована на заслуги и за правото на секоја нација да избира или да ги менува сопствените безбедносни аранжмани, вклучително и нивниот надворешнополитички курс“,
велат од МНР.