Вицепремиерот рече дека очекувањата се оти првата меѓувладина седница би се одржала во текот на германското претседателство односно во периодот помеѓу септември и декември оваа година
Со одлуката за започнување на пристапните преговори, Советот на ЕУ ѝ доделува мандат на Европската комисија (ЕК) за подготвување на преговарачката рамка со условите под кои Унијата ќе ја прими нашата држава како членка, посочи вицепремиерот за европски прашања Бујар Османи.
Нашите информации, рече Османи, се дека Комисијата, оваа преговарачка рамка ќе ја презентира на 3 јуни кога Комисијата ќе излезе и со новиот пакет на проширување, односно и Годишниот извештај за прогрес, истакна Османи на прес-конференција.
„Преговарачката рамка се смета за најважен документ во којшто земјите членки ги утврдуваат своите позиции, а потоа Европската комисија која технички преговара во име на земјите членки, треба да ги почитува тие позиции и потоа континуирано да ги информира земјите членки. Со преговарачката рамка се дефинира текот, опсегот, структурата, клучните услови кои треба да се прифатат, меѓутоа и процедурите низ кои треба да се спроведат преговорите под клаузулата ’ништо не е договорено, додека сè не се договори‘. Тоа значи дека преговорите остануваат отворено до комплетно усогласување на договорот помеѓу двете страни кои на крај се потпишува и ратификува“,
објаснуваше вицепремиерот на денешната прес-конференција.
Оваа драфт преговарачка рамка, посочи тој, потоа ќе оди во КОЕЛА-Комитетот за проширување и преговори како тело на Советот на ЕУ, каде што се усогласуваат позициите на земјите членки за текстот на преговарачката рамка, потоа во КОРЕПЕР – Комитетот на постојаните претставници, тоа се амбасадорите на земјите членки во ЕУ, понатаму во Советот за внатрешни работи, тоа се министрите за Европа и на крај во Европскиот совет-шефовите на државите и премиерите.
„Ние очекуваме дека ова усогласување ќе се случи во јуни во текот на јунскиот Самит на ЕУ со што се отвора можност за одржување на првата меѓувладина конференција. Тоа значи дека преговарачката рамка би се усвоила во текот на хрватското претседателство, а следното трио кое ќе ја предводи ЕУ се Германија, Португалија и Словенија што значи дека ние би ја одржале првата меѓувладина конференција во текот на германското претседателство (втората половина на 2020)“,
рече Османи.
Тоа, рече тој, е добро бидејќи таа е поддржувач на проширување и покрај тоа што се соочува со други предизвици како преговори за буџетот, справување со последиците од пандемијата и со Брегзит.
„Добра околност е одржување на првата меѓувладина конференција во текот на германското претседателство што според ова очекување би било некаде помеѓу септември и декември оваа година“,
рече Османи.
Тој понатаму ја објаснуваше важноста на таа прва меѓувладина седница, која рече дека има политичко, правно и симболично значење бидејќи со неа директно се отвора преговарачкиот процес односно скрининзите. Скрининзите, пак, објасни имаат два дела – објаснувачки и билатерале.
„Двата дела земаат по една година. Среќна околност е што ние објаснувачкиот веќе сме го завршиле минатата година со тоа што ни останува само билатералниот скрининг. Во објаснувачкиот скрининг каде илјадници луѓе од наша администрација и од невладините организации беа во Брисел ние слушавме ЕУ презентираше што треба да направиме. Во билатералниот скрининг е обратно, Европската Унија слуша, ние треба да кажеме до каде сме, што сме направиле, кои се нашите акциони планови за спроведување на транспонирањето на европското законодавство“,
рече вицепремиерот.
Наше е, порача тој, да лобираме и да работиме во овој период преговарачката рамка да биде што поповолна бидејќи во моментот кога таа ќе се усогласи веќе е крај и нема менување на правилата на игра.
Како пример ја посочи Србија потенцирајќи дека токму на преговарачката рамка работела долго бидејќи и било важно каде да се смести прашањето за Косово за кое на крај било одлучено да биде во последното 35 Поглавје.
На крајот, Османи порача дека една од најважните работи е преговорите да станат натпартиско прашање и сите заедно да работат на поскоро затворање.