„И тоа сум го земал од примерот на Хрватска. Како Хрватска стана членка на ЕУ? Кога примиерот и лидерот на опозицијата си подадоа рака и рекоа дека никогаш нема да се препукуваат на оваа тема. И што се случи? Тогаш таму имало најтешка поларизација, но никогаш хрватски опозициски политичар во Брисел нема зборувано против владата на темата ЕУ. И тоа е формулата“, рече тој
Потпретседателот на Демократската унија за интеграција (ДУИ), поранешен шеф на дипломатијата и актуелен кандидат за градоначалник на Општина Чаир, Бујар Османи денеска рече оти е потребно национално единство околу европската интеграција на земјата, коментирајќи ја изјавата на лидерот на опозицискиот Социјалдемократски сојуз (СДСМ) за потпишување декларација во Собранието за евроитеграциите со нашите црвени линии, како и за прекинување на преговорите со Европската Унија доколку добиеме ново вето од Бугарија.
„Најдобриот пат за Република Северна Македонија да стане дел од Европската Унија е да ги задржи правилата што ги договоривме. Секое од тие правила не штитат нас, бидејќи тие се филтер за да нема нови барања. Кое било отстапување од тие правила, значи влегување во една непозната територија, во која секој ќе може да лиферува свои барања. Затоа треба да ги почитуваме договорите и да продолжиме по патот на членство во ЕУ“,
рече тој.
Зборувајќи на темата, Османи додаде дека нови барања и ново вето од страна на Бугарија не смее да има.
Според него, на тема евроинтеграции не треба да се прави дневна политика и изборна математика.
Даде предлог за национален политички договор по примерот на Хрватска, со кој темата за ЕУ повеќе нема да се користи за меѓупартиски напади.
„Колку пати сум барал да потпишеме меѓупартиски договор за темата Европска Унија да не ни биде дел од дневно политичкиот дискурс и препукување. Ајде да се натпреваруваме за образование, за здравство, но за ЕУ – не. И тоа сум го земал од примерот на Хрватска. Како Хрватска стана членка на ЕУ? Кога примиерот и лидерот на опозицијата си подадоа рака и рекоа дека никогаш нема да се препукуваат на оваа тема. И што се случи? Тогаш таму имало најтешка поларизација, но никогаш хрватски опозициски политичар во Брисел нема зборувано против владата на темата ЕУ. И тоа е формулата“,
рече Османи.
Ги повика политичките партии во државата да покажат зрелост и да ја споделат одговорноста за европската агенда.
„Ајде да потпишеме договор сите политички партии дека за тема Европска Унија нема да се критикуваме, нема да се напаѓаме, ќе ја преземеме заеднички одговорноста. И ајде да ги почитуваме договорите, бидејќи тие не штитат нас“,
кажа тој.