Шефот на македонската дипломатија ќе учествува на состанокот на министри за надворешни работи на Западен Балкан, на покана британската министерка, Лиз Трас, а ќе се сретне и со неодамна назначениот специјален претставник на Обединетото Кралство за регионот, Стујарт Пич
Министерот за надворешни работи, Бујар Османи,, патува за Лондон, каде што, на покана на државниот секретар за надворешни работи, Комонвелт и развој на Обединетото Кралство на Велика Британија и Северна Ирска, Лиз Трас, ќе учествува на состанокот на министри за надворешни работи од Западен Балкан.
Како што соопштуваат од македонското МНР, на состанокот како специјални гости се поканети Стјуарт Пич, специјалниот претставник на Обединетото Кралство за Западен Балкан, Мирослав Лајчак, посебен претставник на ЕУ за Западeн Балкан и за дијалогот Белград – Приштина и Габриел Ескобар, заменик помошник државен секретар за европски и евроазиски прашања и специјален претставник на САД за Западен Балкан, кој неодамна беше во посета на Скопје.
Во програмата на Османи се предвидени одвоени билатерални средби со Лиз Трас, Габриел Ескобар, Стјуарт Пич и Мирослав Лајчак, а ќе се сретне и со Мартин Викерс, специјален пратеник за трговија со Западен Балкан на британскиот премиер Борис Џонсон.
Главна тема на дискусија ќе биде Западниот Балкан од аспект на економскиот развој и регионална интеграција, можностите за зголемување на трговската соработка, евроатланската перспектива, борбата против пандемијата, предизвиците на регионалната безбедност, вклучително и перспективите за надминување на отворените прашања во духот на добрососедските односи во насока на постигнување просперитетен, демократски и стабилен регион, информираат од МНР.
Ескобар, при неодамнешната посета на Скопје, го најави неговото присуство на настанот во Лондон, притоа не исклучувајќи можност наскоро да ја посети и Софија. Тој рече дека во Лондон ќе се сретне со новиот британски специјален претставник за Западен Балкан, Стујарт Пич.
„По Скопје заминувам за Босна каде што ќе се одржи Конференција за мировна имплементација. Потоа, одам за Тирана, каде повоторно ќе пратам сигнали за нашата поддршка за зачленување во ЕУ, по што ќе заминам за Лондон за да се сретнам со новиот британски специјален претставник за Западен Балкан, кој ги свикува министрите за надворешни работи на Западен Балкан за да се мапира како нашата соработка во регионот ќе функционира во иднина. Се ова се примери за позитивен развој во регионот. Се надеваме дека Македонија ќе биде целосен партнер и ќе ни помогне да има напредок. Не ја исклучувам можноста во одреден момент да посетам други делови од Европа, каде што има важни прашања за кои треба да разговараме“,
рече Ескобар во интервју за „360 степени“.
Британскиот премиер Борис Џонсон, во почетокот на овој месец, го назначи сер Стујарт Пич за специјален претставник за Западен Балкан. Како што соопштија од Амбасадата на Велика Британија во Скопје, овој чин е дел од континуираната посветеност на Обединетото Кралство на стабилноста и просперитетот во регионот.