Според кандидатот за градоначалник на „Националната алијанса за интеграции“, која е предводена од ДУИ, жителите на Чаир решаваат каква сакаат и каква ќе биде позицијата на Албанците и нивното претставување во државата
Кандидатот за градоначалник на Општина Чаир, Бујар Османи, откако денеска го потпиша Кодексот за фер и демократски избори, ја нагласи важноста на претстојните локални избори оценувајќи дека исходот во Чаир ќе ја одреди не само иднината на општината, туку и положбата на Албанците во државата за наредните децении.
„Овие избори ќе ја одредат иднината на нашата општина, но и на сите Албанци во следните десет, па и дваесет години“,
порача Османи.
Според него, жителите на Чаир решаваат каква сакаат и каква ќе биде позицијата на Албанците и нивното претставување во државата.
„Прво, дали конечно Чаир ќе почне да се менува. Дали ќе ставиме крај на 20 години назадување, уништување и корупција вo нашата општина и ќе тргнеме напред со нова енергија, без корупција, со работа и посветеност. И второ, дали Албанците конечно ќе бидат еднакво и праведно претставени или ќе останат вазали во влада која не ги почитува нивните права“,
рече Османи.
Тој ги повика граѓаните масовно да излезат на гласање.
„Секој глас е важен. Ова е моментот да кажете доста е. Да кажете по 20 години време е за промена. Не само да се сменат луѓето, туку да се смени начинот на владеење, а тоа е чесно, посветено, отворено и заедно со граѓаните. Но, тоа ќе биде можно само ако сите масовно излеземе и гласаме“,
рече Османи.