Не е прашање само дали С Македонија ќе ја одржи првата конференција оваа година, туку и која е перспективата на регионот по однос на Унијата и кој е кредибилитетот на целиот овој процес, рече шефот на дипломатијата по денешната средба со данскиот колега
Иако политичката ситуација во Бугарија е доста комплексна, со оглед дека таму ќе има трет изборен циклус, земјава ќе продолжи да работи и со Софија и со европските партнери, со цел побрзо почнување преговори за членство во ЕУ, изјави денеска министерот за надворешни работи, Бујар Османи, по средбата со неговиот дански колега Јепе Кофод.
„Јас сум оптимист по природа, но од искуството од претходните месеци нема да биде така лесно да се стигне до решение. Но ние ќе продолжиме да работиме и со Бугарија, меѓутоа и со европските партнери. Присуството на министерот овде, неговите силни зборови на поддршка, неговата констатација дека земјата заслужува почеток на преговори, дека треба да ги почне преговорите е навистина силна порака што одекнува секаде низ ЕУ, а верувам дека и во Бугарија, бидејќи не е прашање само дали Северна Македонија ќе ја одржи првата конференција оваа година, туку и која е перспективата на регионот по однос на Унијата и кој е кредибилитетот на целиот овој процес“,
рече Османи.
Според него, пораките што вчера ги упати шефот на грчката дипломатија Никос Денсиас и денеска министерот на Данска охрабруваат ѝ даваат оптимизам дека земјава е на вистинскиот пат.
„Тоа се навистина силни пораки што ме охрабруваат, ми даваат повеќе оптимизам, но што е најважно ги охрабруваат граѓаните дека оваа земја е на вистински пат, оваа земја е подготвена, оваа земја има перспектива и не е прашање дали ќе ги започне преговорите и дали ќе стане членка на ЕУ, туку кога тоа ќе се случи. На тоа работиме на сите можни фронтови, за да биде што побрзо“,
истакна Османи.