Според него, овие локални избори се крстопат, односно, граѓаните на Чаир ќе одлучуваат дали ќе продолжат како досега, во една општина во безредие, во хаос, во нелегални градби, загушена во тесни улици полни со автомобили поради недостиг на паркинг места, прогласена за најнетранспарентна и најнечиста, или тие, како што рече, може ќе одлучат да одберат друга понуда
Секоја продавница што ќе се отвори во чаршија ќе биде субвенционирана од Општината. Секој мајстор кој ќе обучи чирак, ќе има стипендија од Општината, најави денеска кандидатот за градоначалник на општина Чаир од редовите на коалицијата „Национална алијанса за интеграција“ Бујар Османи, на денешното претставување на неговата програма за претстојните локални избори.
„Прашањето на Чаршијата е многу важно. Јас сум рекол дека Чаир нема море, но ја има Чаршијата. Што би посакал секој град да има? На Чаршијата не ѝ треба многу. На Скопската чаршија ѝ треба само да ѝ се врати оригиналниот изглед на минатото. Луѓето во чаршија доаѓаат поради историскиот аспект. И ова ќе биде нашата задача. Само ќе го вратиме изгледот како што било. Да ги вратиме старите занаети, да ги субвенционираме занаетите. Секоја продавница што ќе се отвори во чаршија ќе биде субвенционирана од Општината. Секој мајстор кој ќе обучи чирак, ќе има стипендија од Општината“,
рече Османи.
Според него, овие локални избори се крстопат, односно, граѓаните на Чаир ќе одлучуваат дали ќе продолжат како досега, во една општина во безредие, во хаос, во нелегални градби, загушена во тесни улици полни со автомобили поради недостиг на паркинг места, прогласена за најнетранспарентна и најнечиста, или тие, како што рече, може ќе одлучат да одберат друга понуда.
„Оттука мојата програма е поделена на две траектории. Ургентната, што бара итно делување уште во првиот ден, затоа што сите анализи покажуваат дека за неколку години, доколку продолжи овој третман на зголемување на бројот на жители, на зголемување на бројот на возила, на Чаир му претстои дефинитивен колапс“,
нагласи Османи.
Тој се осврна и на долгорочната визија за Чаир – 2040, која, како што нагласи, е подготвена од најеминентните архитекти во светот, водена од Мишел Ројкинд.
„Ја дефиниравме 2040, за да не ја врзам со мојот мандат, со мандатот на политичката партија туку, тоа да биде еден социјален договор на самите граѓани, коишто ќе го дефинираат тоа како нивно очекување, кои независно кој ќе биде по мене во Чаир, ќе мора да продолжи по тој пат на дефинирање на долгорочната визија за Чаир“,
појасни Османи.
Тој најави повеќе приоритети меѓу кои нови паркинг места, ново комунално претпријатие за хигиена и нова политика за борба против корупција.