Министерот за надворешни работи Бујар Османи, во рамките на учеството на овогодишниот форум во Дубровник, се сретна со вицепремиерката и министерка за надворешни работи на Бугарија, Марија Габриел. Ова е прва средба на двајцата министри по назначувањето на новата политичка влада на Бугарија.
Од МНР информрираат дека Османи упатил честитки и изразил задоволство што со формирањето на новата влада во Бугарија се создаваат дополнителни перспективи за поинтензивен политички дијалог, а со тоа и зголемени можности за зајакнување на билатералната соработка меѓу двата соседи.
„На средбата министрите разменија мислење за работата на секторските работни групи, чии резултати се конкретни и видливи за граѓаните на двете земји, реафирмирајќи ја нивната важност за севкупните односи и соработка. Посебен акцент во разговорите беше ставен на европската перспектива на Република Северна Македонија, соодветно на принципите и одредбите од Договорот за пријателство, добрососедство и соработка“,
соопшти МНР.
Од министерството додаваат и дека двајцата министри разговарале и за актуелните политичко-безбедносни состојби во регионот и потребата од забрзување на евроинтеграциите на државите од Западен Балкан, гледано и низ призма на променетите геополитички околности.