Овие механизми – Бадентер, балансер, јазична застапеност итн. – претставуваат механизми за заштита од мајоризација и токму тие се најголемата пречка за спроведувањето на крајната радикална националистичката политика на Мицкоски, ВМРО и ЗНАМ кон Албанците, вели Османи
Владата на ВМРО-ДПМНЕ и ЗНАМ, предводена од Христијан Мицкоски, во полн интензитет продолжува да ја спроведува политиката која треба да ги отстрани Албанците од општествените текови, враќајќи ги на нивните периферни позиции од пред Рамковниот договор, вели потпретседателот на ДУИ и кандидат за градоначалник на Општина Чаир, Бујар Османи. Во објава на Фејсбук, Османи посочува дека станува збор за системска политика на маргинализација и потиснување на Албанците од сите општествени текови обвинувајќи го премиерот Мицкоски за нетолеранција која се манифестира на лично и институционално ниво.
„Оваа негова суштинска нетолеранција кон Албанците е препознаена и од нашите стратешки партнери, за што често е предупредуван и опоменуван. Оттаму е само логичен обидот да ја заобиколи својата централна улога во одржувањето на оваа политика преку навидум некоординирани и надвор од негова контрола потези и активности на неговите блиски соработници. И тоа почна веднаш со формирањето на Владата. Како поинаку да се толкува доделувањето на клучната Владина позиција за спроведување, негување и унапредување на вредностите и придобивките од Охридскиот Рамковен Договор директно во рацете на српскиот свет во земјава. Ова понижување и на Охридскиот договор, но и на Албанците, продолжи со политичката заштита и промоција на оние кои јавно, отворено и гласно ги вреѓаат и понижуваат Албанците, како што беше случајот со Богоевски, за што реагираа и претставниците на нашите стратешки партнери од ЕУ“,
се наведува во објавата на Османи.
Османи се осврнува и на одлуката на ДИК за намалување на бројот на советници, која според него е неправедна и е поврзана со, како што вели, погрешните толкувања на Владата за пописните резултати.
„Оттука не треба да се биде наивен и да се прифати објаснувањето дека министерот на ЗНАМ наивно ја поставува улогата и на Бадентеровиот механизам како пречка замислете, ‘за напредокот на земјава’. Овие механизми (Бадентер, балансер, јазична застапеност итн.) претставуваат механизми за заштита од мајоризација, и токму тие се најголемата пречка за спроведувањето на крајната радикална националистичката политика на Мицкоски, ВМРО и ЗНАМ кон Албанците. Оваа политика на отстранувањето на механизмите кои ја ограничуваат неговата авторитарна позиција одат рака под рака со неговиот анти-европски наратив.“
додава Османи.
Османи ги обвинува и ВЛЕН за нивната улога во спроведувањето на владините политики.
„Од сите прокси играчи на Мицкоски, (Уставен, ДИК, централната банка, регулаторни тела и разни Максовци и Богоевци…), најбедна е позицијата на ВЛЕН, поточно остатоците од ВЛЕН во Владата. Тие и самите се понижени и отстранети од масата кога Македонците носат одлуки, но уште потрагично, потоа мора да ја играат улогата на поданици – да ги спроведуваат, правдаат и да им даваат легитимитет на овие одлуки. Оваа послушност и потчинетост сега, им ветуваат, во иднина ќе им обезбеди контингент гласови на изборите, кои ќе треба да им го надоместат срамот што сега го доживуваат кај Албанците“
пишува Османи.
Според Османи, Албанците на овие избори гледаат како референдум.
„Тие не сфаќаат дека Албанците веќе не прифаќаат да бидат гости во сопствената држава; дека не прифаќаа да бидат понижувани и подредени, па дури да бидат и замолчувани кога тоа се прави. Не сфаќаат дека Албанците веќе не се среќни кога се во најмала рака толерирани, туку очекуваат да бидат соодветно вреднувани и почитувани. На крајот тие не сфаќаат и дека Албанците не сакаат да се откажат од европската иднина на оваа земја; не сакаат немо да гледаат како земјава се сели во прегратките на српскиот свет и кинеско – руските прегратки, туку дека сакаме да ја видиме како современа, прозападна земја, која е полноправна членка на НАТО и ЕУ. Не сфаќаат, ама наскоро ќе им се разјасни“,
пишува Османи.