Вицепремиерот за европски прашања, Бујар Османи, се заблагодари за високото ниво на дисциплина, свест и саможртва што ја покажале граѓаните во сите овие недели на наметнати рестриктивни мерки.
Тој на денешната прес-конференција,по владината седница на која беа донесени одлуки за укинување и измени на дел од мерките против ковид-19, рече дека решенијата за олабавување не се донесени ад хок, туку се базираат на подолгорочна стратегија.
„Во целиот овој период имаше и одредени пропусти и прекршувања и критики кон нас во имплементацијата на рестриктивните мерки, но морам да кажам дека оваа закана е невидена и претходно ниту еден граѓанин и држава не можеле да се подготват за вакви рестриктивни мерки. Не беше лесно ниту за Владата, ниту за граѓаните кои мораа да ги сменат своите навики, да ги напуштат работните места, да се грижат за образованието на своите деца и да ги ограничат своите движења“,
рече Османи.
Тој додаде дека и покрај евентуалните мали пропусти успешно е воспоставена контрола врз вирусот и не се дозволи ескалирање на ситуацијата.
Османи како успех го потенцираше справувањето со вирусот во Дебар каде од најголема криза и рестриктивни мерки веќе нема позитивни случаи, како и во Куманово кога со навременото тестирање и детектирање беше овозможено нормализирање на состојбата.
„Убедени сме дека тој тренд кој го менаџиравме на локално ниво заедно со локалните штабови сега се случува и на национално ниво, така што дури и денешното зголемување на бројките се во рамки на контролираното и предвидливо сценарио за ширењето на пандемијата“,
рече Османи.