Претседателката на Косово, Вјоса Османи, смета дека нејзината земја може еднострано да ги спроведе Бриселскиот и дополнителниот Охридски договор ако добие три гаранции од меѓународните партнери – безбедноста, нови признавања на независноста и членство во меѓународни организации. Но, како што рече, засега нема конкретен одговор од меѓународната заедница за оваа нејзина позиција.
„Тоа е само мој став, но не мора да е и на другите институции. Реков, се работи за начините што ги користевме во периодот 2007-2008 година. Кога Србија не го спроведе, ние имавме договор со партнерите и сојузниците, иако Косово еднострано го спроведе пакетот на Ахтисари, она што го доби беше независност, признавање, членство во меѓународни организации. Ако меѓународните партнери се заинтересирани да седнеме со нив и спроведувањето на договорите од страна на Косово да се поврзува со меѓународна поддршка, безбедносни гаранции, признавање и членство во меѓународни организации, тогаш тоа е нова ситуација“.
рече Османи.
Таа додаде дека од Косово не може да се бара да ги спроведе обврските од Брисел, а Србија да се повлекува од нејзините задолженија.
„Основниот договор што беше постигнат во Брисел, како и Охридскиот анекс, предвидуваат обврски за двете страни. Не може да се бара спроведување на обврските само за едната страна, додека другата страна, односно Србија, која формално се повлече од договорот, да остане наводно без каква и да е обврска. Договорот има смисла само ако двете страни го спроведат. Значи, во овој случај, Косово има преземено крајно болни обврски, но тие имаат смисла само ако и Србија го спроведе договорот“,
додаде Османи.
Што се однесува до потегот на Белград за усвојување на Законот за судска јурисдикција врз Косово, Османи изјави дека ваквите постапки претставуваат тактика на официјален Белград за дестабилизација на Косово и регионот. Според неа, Србија нема јурисдикција, ниту судска ниту територијална, над Косово од 1999 година.