На прашањето дали тоа што партискиот лидер Али Ахмети како следна цел најавува Албанец за претседател на државата е зелена агенда, Османи одговори дека Ахмети на состаноците со граѓаните ги објаснувал двете поглавја во политичкото дејствување на ДУИ од кои првото е уривање на стереотипите за етнички монопол на одредени функции, што само ѝ носи добро на државата. Сега, рече тој, партијата преминува кон ново поглавје, а тоа е зелената агенда. На дополнително новинарско прашање околу тоа кога тие очекуваат да имаме Албанец за шеф на државата, Османи кажа дека ова не е прашање на рокови и динамика
Портпаролот на ДУИ, Бујар Османи, на последниот ден од изборната кампања пред првиот круг од локалните избори в недела оцени дека неговата партија ќе ја оствари најголемата победа од нејзиното формирање.
„Без да сум субјективен, согласно анкетите кои не се на ДУИ, согласно анкетите на меѓународните организации кои ги вкрстивме во неколку наврати се покажува дека ДУИ ќе ја оствари најголемата изборна победа во нејзината политичка историја. Во моментов имаме само четири општини во кои градоначалник е Албанец, а не е од ДУИ. Ние мислиме дека драстично ќе падне тој број од четири општини и ДУИ ќе издвои изборна победа во најголемиот дел на општини, и урбани и рурални, од Липково до Струга“,
изјави Османи на денешната прес-конференција.
Тој вели дека во првиот дел од кампањата, кој го нарече „прво полувреме“ ДУИ без сомнение победила, а за противниците рече дека имаат и непринципиелен однос и непринципиелна коалиција.
„Со позитивна енергија, со убава понуда, со убав концепт, со убави проекти преку наметнување на зелената агенда како најважен дискурс на оваа кампања успеавме да се спротивставиме и на нападите од страна на политичките конкуренти и на нивниот нефер и непринципиелен однос и на нивната непринципиелна коалиција во која веќе и самите не веруваат“,
вели Османи оценувајќи дека неговата партија преку позитивната енергија имала една од најубавите кампањи досега.
На прашањето дали тоа што партискиот лидер Али Ахмети како следна цел најавува Албанец за претседател на државата е зелена агенда, Османи одговори дека Ахмети на состаноците со граѓаните ги објаснувал двете поглавја во политичкото дејствување на ДУИ од кои првото е уривање на стереотипите за етнички монопол на одредени функции, што само ѝ носи добро на државата. Сега, рече тој, партијата преминува кон ново поглавје, а тоа е зелената агенда.
„Господинот Ахмети на последните состаноци со граѓаните ги објаснува двете поглавја на ДУИ во политичкото дејствување. Поглавјето на создавање заедничка држава кое заврши со претходните парламентарни избори во кое ДУИ со 100 отсто ефективност ги сруши сите табуа во државата дека граѓаните не се еднакви. Успеавме да ги рушиме едно по едно сите зони на етнички монопол кои беа ексклузивно резервирани за една етничка заедница, завршувајќи со премиерот на Владата кој е договорен согласно договорот од 18 август, а ќе биде во последните 100 дена од оваа влада. Промовирајќи го тој концепт дека државата всушност само доби со рушење на овие стереотипи, со овозможување на еднакви права и можности на граѓани, консензуалниот концепт за претседател на државата останува како најдобро решение за оваа држава. Притоа сите граѓани имаат право да бидат дел од консензуалниот концепт за избор на претседател на државата“,
рече портпаролот на ДУИ.
Зелената агенда кон која преминува партијата тој ја објасни како држава во која живеат достоинствени и рамноправни граѓани со европски стандард.
На дополнително новинарско прашање околу тоа кога тие очекуваат да имаме Албанец за шеф на државата, Османи кажа дека ова не е прашање на рокови и динамика.
„Ова не е прашање на рокови и динамика, тоа што ДУИ го прави е дека ги предизвикува стереотипите. ДУИ наметнува теми, отвора теми кои ја растоваруваат државата од ретроградни погледи кои ја држеа оваа држава назад. Формалните прашања се многу помалку важни од тоа што ДУИ во оваа држава го наметнува како агенда во овие 20 години и на некој начин стана кормилар на прогресивниот евроатлантски пат“,
рече Османи.