Брачниот пар, како што објасни Османи, се обидел да го напушти ова подрачје, но во моментот кога стигнале на границата со Египет, властите во Каиро го затвориле граничниот премин
Шефот на дипломатијата денеска на брифинг со новинарите рече дека фокусот на Министерството за надворешни работи и на Кризниот штаб што го формира бил на евакуација на нашите државјани кои се наоѓале во загрозените подрачја, конкретно регионот на Појасот Газа и околу него. Во рамките на овие напори ноќеска и денеска оттаму се евакуирани 22 наши државјани, кои се транспортирани до Атина, а оттаму со автобус до Солун, од каде што со посредство на конзулатот се носат до границата со Северна Македонија
Османи најави дека утре од Израел треба да бидат евакуирани уште 90 македонски државјани, а тоа, како што рече, ќе биде во организација на Владата, но за детали околу начинот и механизмот посочи дека ќе информира во текот на денот
Дваесетина македонски државјани кои војната меѓу Хамас и Израел ги затекнала во и околу Појасот Газа, каде што ситуацијата е најкритична, се евакуирани, соопшти шефот на дипломатијата Бујар Османи на денешниот брифинг со новинарите.
Петмина од нив, како што информира Османи, ноќеска пристигнале во Атина, а дополнителни 17 наши државјани, кои се наоѓале во загрозените подрачја, веќе се во главниот град на Грција, Атина, и треба да се на пат кон Солун. Оттаму, со посредство на конзулатот, се носат до границата со Северна Македонија, од каде што со возила на Министерството за надворешни работи ќе бидат транспортирани до нивните домови.
Сепак, не сите ја имале среќата на овие 22 македонски државјани. Министерот информира дека двајца македонски државјани сè уште се заглавени во Појасот Газа, кој е изолиран, односно херметички затворен од израелските сили и се прават напори за нивно извлекување.
Станува збор за брачен пар кој, како што објасни Османи, се обидел да го напушти ова подрачје, но во моментот кога стигнале на границата со Египет, властите во Каиро го затвориле граничниот премин.
Шефот на дипломатијата на почетокот на брифингот рече дека фокусот на Министерството за надворешни работи и на Кризниот штаб што го формира бил на евакуација на нашите државјани кои се наоѓале во загрозените подрачја, конкретно регионот на Појасот Газа и околу него.
Во тој контекст тој информира за динамиката и начинот на кој се одвивала евакуацијата на 22-та македонски државјани. Со нив, вкупниот број македонски државјани кои се евакуирани од Израел изнесува 60.
„Таму имавме дваесетина наши државјани и тука беше нашиот првичен фокус, да ги идентификуваме, да ги контактираме, да ги извлечеме од загрозените подрачја, да ги пренесеме до Тел Авив, каде што имаше функционален аеродром и потоа од Тел Авив да најдеме начин како да ги извлечеме од Израел. И можам да ви кажам дека од тие дваесетмина коишто беа во загрозените подрачја, ноќеска петмина стигнаа во Атина. Нашата амбасада, се разбира, им обезбеди места во нашата комуникација на Кризниот штаб со грчките власти. Амбасадата во Тел Авив ги испрати од Израел, ги пречека нашата амбасада во Атина, беа транспортирани со автобус до Солун, нашиот конзул таму ги пречекува и ги носи до граница со Република Северна Македонија и тука ги презема Министерството за надворешни работи со наши возила и ги носи до нивните домови. Така ноќеска беа вратени петмина, а утринава дополнително 17 од тие дваесетмина коишто беа во загрозените подрачја, пристигнаа веќе во Атина и во моментов доаѓаат накај Солун, а Министерството за надворешни работи веќе организира превоз и ги пречекува на границата за да ги однесе до нивните домови“,
брифираше министерот за надворешни работи.
Брачниот пар е на безбедно, но ситуацијата во Газа е многу променлива
Дотука, како што рече тој, приказната е добра, по што информира за брачниот бар заглавен во Газа, кој според последните информации се наоѓа на безбедно, но поради непредвидливата ситуација во овој регион, ситуацијата во која се наоѓаат се смета за ризична.
„Имаме само еден брачен пар којшто е внатре во Газа во загрозените подрачја, а знаете дека Газа е изолирана од Израел. Единствениот излез беше преку Египет, преку тој граничен премин, меѓутоа брачниот пар во моментот кога стигнал на граничниот премин, тој се затворил и не можат да излезат ниту кон Египет ниту кон Израел. Од нашата амбасада во Каиро се во комуникација со тој брачен пар, во постојана комуникација и тие се безбедни во моментот, меѓутоа знаете дека таму ситуацијата е многу променлива и можеме да сметаме дека тие се во некаков ризик. Работиме и со властите во Египет за да ги ослободат да излезат во Египет, а потоа ќе организираме превоз, меѓутоа засега немаме начин како да ги извлечеме од Газа, тој брачен пар“,
рече Османи.
Прашан од новинарите дали постои шанса тие да бидат извлечени, министерот за надворешни работи изјави „засега немаме конкретен одговор од таму како ќе бидат извлечени“.
„Нашата амбасада во Каиро и Кризниот штаб ги имаат телефонските броеви, комуницираат, последната информација е дека се безбедни“,
рече Османи.
Во однос на останатите, министерот за надворешни работи информираше дека досега се идентификувани, контактирани и регистрирани вкупно 150 граѓани за евакуација од Израел по избувнувањето на насилствата. Од нив 60 се веќе вратени или се на пат кон дома, вклучително со последната група од 22 лица, а останатите 90 Османи очекува утре да бидат бидат вратени во С Македонија.
Истовремено, посочи Османи, од МНР работат на изнаоѓање начин за извлекување на брачниот бар од Газа.
Во врска со евакуацијата на овие 90 македонски државјани, Османи, одговарајќи на новинарски прашања рече дека нивното враќање ќе го организира земјава, односно Владата, а како и на кој начин тоа ќе биде спроведено, рече дека ќе информира во текот на денешниот ден.
„Ние ќе ги вратиме, се организираме денеска и ќе бидете информирани во текот на денот“,
рече Османи.
Ќе имавме предност да имавме посоодветен владин авион, вели Османи
Прашан на кој начин ќе биде извршена евакуацијата и дали ќе има чартер-лет, Османи повтори дека тоа го организира Владата и оти јавноста ќе биде информирана за точните термини кога овие лица ќе бидат вратени.
„…единствена предност би имало да имавме владин авион посоодветен да ги евакуираме уште порано, меѓутоа тоа е ситуација за која треба да се размисли за во иднина“,
рече Османи.
На дополнително прашање дали може да се изнајми авион, шефот на дипломатијата со одговори:
„Тоа го правиме, ќе ви кажам во текот на денот за тоа, сега не можам да ви кажам“.
Зошто Владата досега не организирала враќање на сите македонски државјани одеднаш, беше уште едно од прашањата што го поставија медиумите, на што Османи одговори дека ситуацијата во Израел почна да ескалира пред четири дена, а Министерството уште од првиот ден ги идентификувало луѓето.
„Ние немаме податоци кој и каде бил и во кој момент. Ги идентификуваме, ги регистриравме. Фокусирани бевме на овие дваесетмина кои беа во загрозените подрачја. Во Тел Авив во моментот се живее, ако можам да кажам, нормално. Аеродромот функционира, животот функционира и тие се на безбедно. Тие што не беа на безбедно беа овие дваесетмина граѓани коишто беа во Газа и наш приоритет беше овие граѓани да стигнат во Скопје и за среќа, 22 пристигнуваат денеска, ако веќе се стигнати во Атина, односно се на пат кон Скопје, работиме на овој брачен пар да го извлечеме од регионот… Ниту еден од овие граѓани коишто ние сме ги идентификувале не е загрозен“,
рече Османи.
Тој додаде дека не ја исклучува можноста да има граѓани кои не се идентификувани, кои не се јавиле дека се таму.
„Може да има наши државјани кои се во брачна врска со израелски државјани и коишто не сакаат да се евакуираат, тие можеби не нè контактирале. Затоа велиме дека меѓу 100 и 200 може да биде бројот на нашите граѓани, досега сме идентификувале, регистрирале, контактирале 150. Од овие 150, 60 се вратени, утре чекаме да се вратат овие 90“,
повтори шефот на дипломатијата.
Во истиот контекст потврден беше и неговиот одговор на прашањето дали имало наши државјани кои биле контактирани од македонските власти, но рекле дека се чувствуваат безбедни и оти не сакаат да се вратат.