МНР со внимание ги следи изјавите и активностите што доаѓаат од Република Бугарија и со жалење констатира дека последните активности на официјална Софија не се во согласност со договорената практика за унапредување на меѓусебните односи, рече шефот на дипломатијата одговарајќи на пратеничкото прашање на Антонио Милошоски
Сега, порача шефот на дипломатијата, е потребна деескалација на односите и прекинување на овој циклус на провокации што се создаваат меѓу двете држави. Но, како што додаде, секогаш треба да имаме предвид дека станува збор за групи кои сакаат да ги киднапираат односите меѓу Скопје и Софија поради многу други причини, вклучувајќи и трети страни
Одговарајќи на прашањето на пратеникот на ВМРО-ДПМНЕ и претседател на собраниската Комисија за надворешни работи, Османи сподели и пример со дебата на Советот на Европа минатата недела, на која Бугарија се обидела да протне амандмани на резолуција за малцинските прашања во С Македонија, но не добила поддршка од ниту една друга земја членка. „Мора да бидеме внимателни тоа да биде случај и во Европската Унија“, подвлече министерот
Министерството за надворешни работи изразува жалење за потегот на Софија да го повика на консултации својот амбасадор во земјава Ангел Ангелов и го смета ваквиот чекор како неоснован, непоткрепен со валидни аргументи и непропорционален, рече шефот на македонската дипломатија Бујар Османи одговарајќи на пратеничко прашање на народниот избраник од редовите на ВМРО-ДПМНЕ, Антонио Милошоски, на денешната собраниска седница на чиј дневен ред се пратенички прашања.
Претходно Милошоски, поставувајќи го прашањето, наведе дека ваквиот потег може да се толкува како чин на спуштање на дипломатските односи и потценување на државата домаќин.
Османи на ова истакна дека МНР со внимание ги следи изјавите и активностите кои доаѓаат од Република Бугарија и дека со жалење констатира дека последните активности на официјална Софија не се во согласност со договорената практика за унапредување на меѓусебните односи.
Напротив, додаде шефот на дипломатијата, ваквите активности претставуваат потклекнување кон провокациите на оние што сакаат да ги нарушат напорите на двете влади за стабилен и позитивен развој на односите меѓу двете земји.
„Иако повикувањето амбасадор на консултација во матичната држава е право на земјата испраќач и редовна дипломатска пракса, Министерството за надворешни работи изразува жалење за ваквиот чекор за кој смета дека е неоснован, непоткрепен со валидни аргументи и непропорционален“,
рече Османи.
Северна Македонија, потенцира тој, покажа силен демократски и институционален капацитет и низ брза и ефикасна постапка го стави последниот инцидент со секретарот на бугарскиот клуб „Цар Борис Трети“ низ правосудните процеси откривајќи ги и приведувајќи сторител на кривичното дело, против кого активно се водат истражни дејствија.
„Дополнително, преку своите изјави на највисоко ниво, претседателот на државата, премиерот на Владата и јас како министер за надворешни работи, го осудивме инцидентот, а дополнително остварив и итна посета на Софија, вклучувајќи и посета на повредениот со цел јасно да ја демонстрирам одлучноста на државните органи во обезбедување правна сигурност, безбедност и одржлив јавен ред“,
рече шефот на дипломатијата.
Во периодот што следува, истакна Османи, земјава внимателно ќе ги следи сите изјави и постапки на официјална Софија очекувајќи смирување на страстите и отстранување на провокациите, со цел повторно враќање на дипломатските активности, на приоритетите кон заедничките проекти, кои се во насока на зачувување и унапредување на добрососедските односи.
Шефот на дипломатијата одговори и на прашањето што Милошоски му го упати на министерот за правда Никола Тупанчески, дали во вчерашното телевизиско гостување мислел на Османи кога рекол дека некои претставници на власта предвреме излегле со изјави и оценки за инцидентот во Охрид.
„Нашата осуда беше откако Основното јавно обвинителство во Охрид имаше првична проценка дека инцидентот е поради елементи на идентитетски или етнички обележја и изјавата која беше спомената од г. Милошоски, за да нема дополнителни прашања за чија изјава станува збор – да, министерот за правда веројатно мислел на мојата изјава којашто беше извадена од контекст и можеби сум можел и подобро да ја срочам, признавам. Меѓутоа, таа беше дадена во контекст на прашање на бугарска телевизија, зошто го осудивме отворањето на клубот `Ванчо Михајлов` ако сè уште нема официјална одлука на историската комисија за контроверзноста. Мојот одговор беше дека е доволно што македонскиот народ, што мнозинството граѓани се иритирани, повредени и навредени од таквото име и не морам да чекам одлука на историската комисија за да го осудам и преземам мерки, исто како што ми беше доволна загриженоста на родителите на оштетениот по однос на нападот за да не чекам завршување на истрагата кога веќе има иницијална проценка на Обвинителството“,
рече Османи во одговорот до Милошоски.
Говорејќи во контекст на ставот дека во Република Северна Македонија нема државна политика на дискриминација кон ниту една заедница, вклучувајќи ја и бугарската, Османи посочи денеска дека во една пригода изјавил дека сезоната на лов од страна на провокатори и политички профитери е почната и дека секој ќе се обиде на вакви сензитивни теми да го изгради својот наратив.
„Може да има индивидуални проблеми и загрижености, за што сме отворени да разговараме и ние треба да ги адресираме таквите прашања за да не дозволиме на некого на такви индивидуални случувања да изгради наратив дека овде се води системска државна политика кон една заедница. За тоа беше моето одење во Софија и мислам дека тоа одење во Софија го затвори тој случај пред Европската Унија, пред земјите членки на Европската Унија и ние така треба да продолжиме – ладнокрвно, внимателно да го зачуваме тој имиџ и да изградиме стратегија за државните интереси, а не да јаваме на бранот на јавноста. Најлесно нешто што може еден политичар да направи е да се качи на вагонот на емоциите на јавноста, да добие краткорочни аплаузи, а притоа да направи долгорочни штети на државата“,
истакна Османи.
Сега, порача шефот на дипломатијата, е потребна деескалација на односите и прекинување на овој циклус на провокации кои се создаваат меѓу двете држави. Но, додаде тој, секогаш треба да имаме предвид дека станува збор за групи кои сакаат да ги киднапираат односите меѓу Скопје и Софија поради многу други причини, вклучувајќи и трети страни.
„Ние не смееме, ниту бугарската влада смее да потклекне, иако веќе во услови на објавени избори и кампања (во Бугарија) тоа ќе биде сè потешко. Меѓутоа и ние не смееме да потклекнеме на провокациите на оние што сакаат да ја киднапираат европската иднина на оваа држава“,
порача Османи.
Одговарајќи на прашањето на пратеникот на ВМРО-ДПМНЕ и претседател на собраниската Комисија за надворешни работи, Османи сподели и пример со дебата на Советот на Европа минатата недела, на која Бугарија се обидела да протне амандмани на резолуција за малцинските прашања во С Македонија.
„Ниту една земја членка на Советот на Европа не даде поддршка. Тоа е поради тоа што ние сме докажале во пракса дека нема системска дискриминација и формулацијата системска дискриминација не влезе во таа резолуција. Ние мора да сме внимателни тоа да се случи и во Европската Унија“,
подвлече Османи.
Милошоски не беше задоволен од одговорот и го обвини Османи дека токму со неговото одење во Софија ги поттикнал тензиите во односите меѓу двете земји и дека активностите што изминатите денови ги презема или најавува, ќе ги преземе официјална Софија.