Оштетувањата на „Беласица“ се мали, но ќе треба санација – извештајот е предаден во Град Скопје, вели Гаревски

За да може да се спроведе санацијата на мостот неопходно е да се извадат цевките за парно кои се наоѓаат под мостот

Иако Гаревски тврди дека извештајот е предаден во Град Скопје, оттаму велат оти во моментов не располагаат со никакви информации

Експертизата за опожарениот мост „Беласица“ е направена од приватниот Институт за сеизмички отпорни градби и климатски промени  и драфт верзијата е предадена во Град Скопје, потврди за МИА директорот на Институтот, професор Михаил Гаревски.

Од визуелната инспекција, вели Гаревски, не е забележана ниту на еден дел од мостот изложеност на каблите за преднапрегање, туку тие се скриени со заштитниот слој на бетон. Ова е основниот услов и затоа оштетувањата се мали.

(ВИДЕО) Мост „Беласица“: Пожар го затвори, конфузија кога да се отвори

Иако оштетувањата се мали, посочува, сепак ќе треба да се изврши санација.

Но, потенцира Гаревски, потребна е санација на плочата над примарните цевки за парно со торкретирање за да се врати заштитниот слој од бетон кој ја штити ребрастата арматура од корозија. Потребно е и да се врати паднатиот бетон на некои површини од долната плоча и вертикалните ребра на сандачестите носачи. За да може да се спроведе санацијата на мостот неопходно е да се извадат цевките за парно кои се наоѓаат под мостот, појаснува професорот.

Иако тој вели дека извештајот е предаден во Град Скопје, оттаму велат дека во моментот не располагаат со никакви информации.

„ЕСМ дистрибуција на топлина“ најави отстранување на опожарениот топловод на мостот „Беласица“ во најкраток можен рок  

Мостот „Беласица“ е клучна артерија меѓу двата дела на Скопје што ги дели реката Вардар,а на 12 мај беше зафатен со голем пожар по што веднаш беше затворен за да се истражи дали има општетувања и дали е безбеден за користење.