Оштетени биле две споредни цевки кои носат кислород од централниот систем до првиот објект ургетно-дијагностичкиот центар, додека снабдувањето до ковид-одделенијата одело непречено преку главната цевка
Непознати сторители синоќа го оштетиле системот за централен довод на кислород во објектите на тетовскиот ковид-центар, но за среќа нема последици по живтотите на пациентите.
Како што информира МИА, оштетени биле две споредни цевки кои носат кислород од централниот систем до првиот објект ургетно-дијагностичкиот центар, додека снабдувањето до ковид-одделенијата одело непречено преку главната цевка.
„Изгледа имавме среќа сите 125 пациенти што ги имавме ги спасивме, бидејќи да имаше оштетување на главната цевка тоа ќе беше катастрофа и не би сакал да предвидам што би можело да се случи и што би можеле ние да направиме во тие моменти. Тоа би требало да значи транспорт на сите пациенти од сите одделенија, а имаме нетранспортибилни пациенти. Замислете би требало да има над 70 отсто од пациентите да се транспортираат итно, за наша среќа не се случи. Се надевам дека сега полиција ќе видат за што се работи и кој е авторот на ова дело“,
изјави д-р Гзим Нуредини, координатор во ковид-центарот на Клинича болница.
Во ургентно дијагностичкиот центар немало пациенти и на тој начин не дошло до поголеми последици.
„Немало прекин во довод на кислород затоа што тој дел го снабдува делот од ургетниот центар каде што имаме пациенти со инфаркти и друго каде ни треба кислород по потреба. Така да имаше таму пациенти одма ќе имаше последици. Замислете цела недела и викенд деновите беа тешки со ковидот и ние сме навистина многу разочарани од ова. Се гледа дека некој со удирање со метален предмет врз цевките, една ја пресекол, додека другата е свиткана. Сега мора и ќе се преземат мерки за поголемо обезбедување“,
изјави д-р Нуредини.
Случајот е пријавен и во полицијата од каде е извршен и увид.
„Со употреба на физичка сила биле оштетени две бакарни цевки со различна големина, односно капацитет. Едната цевка за компримиран воздух била скината, а втората за азотен оксидол била свиткана. Набрзо по пријавата, екипа на Секторот за внатрешни работи Тетово, во координација со Јавен обвинител, извршила комплетен увид. Оштетувања се фотодокументирани и крим-технички обработени. Се расчистува и документира случајот“,
изјави портпаролот на СВР-Тетово, Марјан Јосифоски.
До пладнето во болницата стручни лица од соодветна фирма извршија и санација на оштетувањата на централниот систем за довод на кислород во тетовската болница.