Асоцијацијата за организирање настани најавува дека од понеделник ќе излезат на улица со цел да ја побараат помошта која, како што велат, им следува во време на криза.
„Ги повикуваме сите колеги што работат во овој сектор, како и сите други придружни дејности без кои нашата индустрија не може да постои, да ни се приклучат. Не сме многу, но нема да дозволиме да останеме невидливи. Компаниите што работат во секторот организација на настани (организатори, изнајмување на опрема за озвучување, осветлување и сценска опрема, видео и аудио продукции како и техничка поддршка на настаните) се доведени до тотален колапс“,
велат од Асоцијацијата.
Додаваат дека повеќе од една година не работат и не остваруваат приходи бидејќи не се одржуваат јавни настани, концерти и слично.
„Ниту, пак, имаме надеж дека наскоро ќе можеме да работиме. Исто така, јавноста треба да знае дека овие компании добија нула денари помош од државата. И покрај сите наши барања, дописи, молби за помош, Владата остана глува а ние невидливи во сопствената држава. Од друга страна, сведоци сме дека некои други сектори повеќепати беа помогнати со грантови и друга помош. Но, според официјалната статистика на Централниот регистар, нашиот сектор има пад на промет од 62,103 % за 2020 година и тоа е можеби највисокиот пад споредено со другите индустрии“,
велат од Асоцијацијата.