Во интервју за унгарското државно радио Кошут, Орбан изјавил дека разговарал со домашната компанија за нафта и гас – МОЛ за санкциите, без да наведе детали
Унгарија работи на изнаоѓање начин за заобиколување на санкциите што Соединетите Американски Држави (САД) ги воведоа врз двете најголеми руски нафтени компании, изјави денеска унгарскиот премиер Виктор Орбан, без да наведе детали за опциите што ги разгледува Будимпешта и дали тоа значи кршење на санкциите, пишува Ројтерс.
Американскиот претседател, Доналд Трамп, инаку близок сојузник на унгарскиот лидер Орбан, завчера воведе санкции врз Русија, првпат во својот втор мандат во Белата куќа, а во насока да изврши притисок врз Москва во рамките на неговите напори за постигнување мировно решение за војната во Украина.
Санкциите се воведени врз двете најголеми руски нафтени компании „Лукоил“ и „Роснефт“ кои извезуваат повеќе од половина од руската сурова нафта.
Потегот на Трамп доведе до зголемување на цените на нафтата на светските пазари и истовремено предизвика загриженост во Унгарија и Словачка, кои, иако се членки на Европската Унија, се најголеми купувачи на руска нафта и кои веќе мораа да се погрижат да издејствуваат исклучоци од европските ограничувања.
Во интервју за унгарското државно радио Кошут, Орбан изјавил дека разговарал со домашната компанија за нафта и гас – МОЛ за санкциите.
„Работиме на тоа како да ги заобиколиме овие санкции“,
рекол тој во интервјуто.
Инаку, рафинериите на МОЛ во Унгарија и Словачка, со комбиниран капацитет за преработка од 14,2 милиони тони сурова нафта годишно, зависат од руската сурова нафта транспортирана преку нафтоводот „Дружба“.
Од словачката подружница на МОЛ, „Словнафт“, вчера изјавија дека го анализираат можното влијание на американските санкции, кои треба да стапат во сила во ноември, врз нејзиното работење.
Унгарската компанија МОЛ се соочи со проблеми со снабдувањето со руски енергенси откако Украина лани воведе санкции кон „Лукоил“.
Соединетите Американски Држави во средата соопштија дека воведуваат санкции врз двете најголеми руски нафтени компании, кои сочинуваат повеќе од половина од извозот на сурова нафта во Русија. Одлуката на американскиот претседател Доналд Трамп, британски „Гардијан“, но и други светски медиуми, ја оцени како пресврт во неговата политика кон Москва бидејќи претходно одбиваше да воведе санкции сè додека западните земји не престанат да купуваат руски енергенси.
Коментирајќи го потегот на Вашингтон, рускиот претседател Владимир Путин вчера изјави дека новите американски санкции се обид за притисок врз Русија додавајќи дека тие нема да влијаат на економијата на земјата.
Путин санкциите ги нарече непријателски чин што не одат во насока на зајакнување на односите меѓу Москва и Вашингтон додавајќи дека енергетскиот сектор на Русија се чувствува сигурен, иако новите американски санкции ќе доведат до одредени загуби.