Против овие решенија, двајцата обвинети имаат право на жалба до Апелацискиот суд Скопје
Куќен притвор им е определен на поранешниот медицински и на организацискиот директор на ЈЗУ Универзитетска клиника за радиотерапија и онкологија Скопје, Нино Васев и Нехат Нухи, информираа попладнево од Основниот кривичен суд Скопје. Покрај куќниот притвор, од Кривичен велат дека остануваат и претходно изречените мерки на претпазливост.
Кривичниот совет при Основниот кривичен суд, како што велат оттаму, одлуката ја донел во присуство на странките.
„Кривичниот совет при Основниот кривичен суд Скопје, постапувајќи по предлог на Основното јавно обвинителство Скопје, за определување мерки за обезбедување присуство против две лица, доставен до судот заедно со обвинителен акт за предметот во јавноста познат како ‘Онкологија’, по одржана седница во присуство на странките донесе решенија со кои против обвинетите Н.В. и Н.Н, се определува мерка куќен притвор, а воедно останува во сила претходно определената мерка на претпазливост – одземање на патна исправа и забрана за издавање нова, поради постоење на опасност од бегство“,
се вели во информацијата од Кривичниот суд.
Против овие решенија, двајцата обвинети имаат право на жалба до Апелацискиот суд Скопје.
Во однос на другите тројца доктори онколози, за кои исто така се предлозжени мерки на претпазливост – привремено одземање на патна или друга исправа за преминување на државната граница односно забрана за нејзино издавање, од Кривичен велат дека не бил побаран притвор.
Од Основното јавно обвинителство Скопје информираа дека заедно со поднесените обвиненија во предметот „Онкологија“, до Основниот кривичен суд Скопје вчера бил поднесен и предлог за определување мерка притвор за двајца обвинети – медицинскиот и организацискиот директор на ЈЗУ Универзитетска клиника за радиотерапија и онкологија Скопје.
Како што информираат од Обвинителството, на обвинетите им се ставаат на товар повеќе кривични дела за кои се предвидени високи затворски казни, а последицата од сторените кривични дела опфаќа и нанесување значителна имотна штета на буџетот на државата, што може да влијае врз мотивот на обвинетите да се дадат во бегство.
Основното јавно обвинителство Скопје вчера поднесе две обвиненија за предметот „Онкологија“. Како што соопшти вчера на прес-конференција предметната јавна обвинителка Ана Гоговска-Јакимовска, предметот е поделен на два дела – првиот се однесува на економското работење на Клиниката во кој се опфатени тогашниот медицински директор и организацискиот директор на клиниката, и вториот дел од предметот се однесува на третманот на пациентите и опфаќа четворица лекари онколози.
Од Универзитетска клиника за радиологија и онкологија денеска апелираа до сите засегнати, посебно до пациентите и нивните блиски, да останат смирени, сталожени и доверливи во однос на целокупниот работен процес на клиниката, уверувајќи дека по отворањето на случајот „Онкологија“ се воведени драстични промени во работата, сè со цел стандардизирање на третманот на пациентите.