Мерката краткотраен притвор, како што велат од Обвинителството, е за обезбедување докази во однос на сомненијата и за да се извршат вештачења, анализи на камери, известувања од претрес и други дејствија
Основниот суд, по предлог на Јавното обвинителство, му одреди краткотраен притвор од 48 часа на Стојанче Јовановски, сопруг на 31-годишната жена која заедно со нивното шестгодишно дете падна од балкон во скопската населба Карпош, информираа вечерва од Основното јавно обвинителство Скопје.
Јовановски е осомничен за наведување на сторување самоубиство, нанесување телесни повреди и загрозување на сигурноста.
Мерката краткотраен притвор, како што посочуваат од Обвинителството, е за обезбедување докази во однос на сомненијата и за да се извршат вештачења, анализи на камери, известувања од претрес и други дејствија.
„Притворската мерка е неопходна со цел преземање на сите истражни дејствија со цел обезбедување докази во однос на сомненијата. По предлог на јавниот обвинител, судот определи притвор“,
се вели во соопштението од Обвинителство.
Министерот за внатрешни работи Панче Тошковски претходно денеска на прес-конференција информира дека Стојанче Јовановски е задржан во полициска станица по трагичниот настан во скопско Тафталиџе и оти досега ѝ бил познат на полицијата по дела поврзани со насилство и други криминални активности.
Тошковски рече дека против Стојанче Јовановски во изминатите години скопската полиција поднела вкупно 10 кривични пријави за дела од областа на насилниот криминал, имотни деликти и недозволена трговија со дрога.
Во одговор на новинарско прашање соопшти дека лицето е задржано во полициска станица под сомнение за сторени три кривични дела – наведување на самоубиство и помагање во самоубиство (од член 128 на Кривичниот законик), нанесување телесни повреди поврзани со семејно насилство (според член 130 став 2 од КЗ) и загрозување на сигурноста, според член 114 став 3 од КЗ.
Како што појасни Тошковски, пред падот имало расправија меѓу сопружниците и интервенција на полицијата по пријава за насилство.
Поврзани вести:
- Мајката и детето биле сами во станот и заклучени одвнатре пред трагедијата, едно лице е задржано во станица
- Социјалните служби првпат ги евидентирале починатата жена и нејзиниот сопруг во октомври лани по поднесена тужба за развод
- (ВИДЕО) Сосетка на починатите во Тафталиџе за „Слободен печат“: Насилникот не бираше време и место, ја тепаше Ивана и пред влез и во лифт
- Се огласи братот на жената која со детето беше пронајдена мртва: По години пријавувано семејно насилство, ги загубив внуката и сестрата
- Мајка и дете пронајдени мртви по пад од балкон во скопско Тафталиџе