Според очевидци на местото на настанот, возилата биле паркирани едно до друго, а пожарот прво избувнал од едното возило, а потоа ги зафатил и другите два автомобила
Ноќеска, половина час по полноќ, е пријавено дека се опожарени три возила на улицата „Леринска“ во Битола, информираат денеска од Министерството за внатрешни работи (МВР).
Според неофицијални информации, едно од возилата е сопственост на бизнисменот и поранешен кандидат за градоначалник на Општина Битола од редовите на Социјалдемократскиот сојуз (СДСМ), Христо Кондовски.
Според очевидци на местото на настанот, возилата биле паркирани едно до друго, а пожарот прво избувнал од едното возило, а потоа ги зафатил и другите два автомобила.
Од полицијата информираат дека сите возила се сопственост на приватни фирми.
„Опожарени се патничко возило ‘тојота рав 4‘ со битолски регистарски таблички, сопственост на приватна фирма, а го користела С.К. од Битола, патничко возило ‘фолксваген пасат‘ со тетовски таблички, сопственост на приватна фирма и возило марка ‘дачиа логан‘ со скопски регистарски ознаки, сопственост на фирма“,
се вели во соопштението на Секторот за внатрешни работи (СВР) Битола.
Увид извршила екипа на СВР Битола и констатирано е дека нема повредени.
Пожарот е изгаснат од пожарникарите на Територијалната противпожарна единица Битола.
Од СДСМ Битола го осудија опожарувањето на возилото на поранешниот кандидат за градоначалник од редовите на нивната партија.