Наместо во задолжителен државен карантин, македонските граѓани кои влегуваат во земјава со хуманитарните летови или конвои ќе може да одат во домашна самоизолација доколку приложат негативен ПЦР тест направен најдоцна 72 часа при влезот во земјава.
Ова е еден од заклучоците на денешната владина седница. Исто така, одлучено е сите лица кои се спроведени во објектите за државен карантин, на свој трошок, можат да направат ПЦР тест во објектот во кој се сместени и доколку имаат негативен резултат да бидат упатени во домашна самоизолација.
„На оваа седница, на предлог на Министерството за надворешни работи, во соработка со Комисијата за заразни болести, е усвоен протокол за странски дипломати акредитирани во земјата и членови на нивните семејства, кои доколку приложат медицинска потврда за негативен ПЦР тест направен во последните 72 часа пред влез во Република Северна Македонија, ќе можат непречено и тековно да ја извршува својата работа, без упатување во домашна самоизолација“,
информираат од Владата.
Освен овие одлуки, на денешната седница на Владата ги задолжи Комисијата за заразни болести при Министерството за здравство да направи јасна и прецизна процена за отворање на државните граници, како и да подготват соодветни протоколи за влез и излез на и од територија на земјава.
„Беше заклучено дека оваа одлука ќе се донесе врз основа на заедничката координација со земјите од регионот со кои е воспоставена одлична комуникација која најавува дека многу бргу патувањето во регионот ќе биде регулирано во интерес на граѓаните на сите земји“,
информираат од владината ПР-служба.