Потенцијалниот нов мобилен оператор во земјава треба да почне со работа на крајот на 2026 година
„Оне Македонија телекомуникации“, фирма на унгарската „Фор-ај-џи“, е единствената компанија која достави понуда на тендерот на Агенцијата за електронски комуникации (АЕК) за доделување одобренија за нов мрежен оператор. На јавното отворање на понудите што се одржа денеска во АЕК, Комисијата за спроведување на тендерот констатира дека понудувачот ги доставил сите документи.
„Три заинтересирани страни подигнаа тендерска документација, но официјално доставена е само понуда од еден понудувач. Сите документи од понудувачот се доставени. Ќе се продолжи согласно законот. Следува евалуација на документацијата, по што ќе се изготви извештај до директорот на АЕК, со предлог што да се направи како следен чекор,“
рече Игор Бојаџиев, претседател на Комисијата.
Бидејќи има само еден понудувач, нема да се спроведе јавно наддавање, посочија од комисијата и најавија дека постапката ќе се одложи поради изборите.
„Треба да се има предвид известувањето од ДКСК дека во периодот до завршување на изборите не смее да се отуѓува државен капитал. Бидејќи радиофреквенциите се државен ресурс со кој управува државата и во случајот ќе се отуѓат, финалната одлука доколку е се во ред ќе се донесе по завршување на изборите,“
додаде Бојаџиев.
Потенцијалниот нов мобилен оператор во земјава, според условите од тендерот, треба да почне со работа на крајот на 2026 година.
Министерот за транспорт Александар Николоски порача дека е добро да има конкуренција на пазарот и ги искритикува постојните мобилни оператори дека не преземале ништо за да ги намалат цените.
„Од прв ден кога бев избран на функцијата кажав дека на македонскиот пазар има дуопол помеѓу двата мобилни оператори и тоа е факт кога ќе видите поделба на пазарот 51 и 49. Се е јасно, во однос на квалитетот и на цените мислам дека граѓаните доволно кажуваат, така што конкуренцијата е здрава и добра. Од АЕК кажаа дека имаат одредени ограничувања поврзи со изборите, но изборите ќе завршат за два месеца, процедурата ќе си продолжи. Согласно тендерските правила веќе на крајот на следната година треба да работи новиот оператор, што значи дека му се дава една година да се опреми, со базни станици, итн, и веќе во следната година ќе можеме да имаме мобилни телефони и со трет оператор во државата,“
кажа Николоски.
Агенцијата за електронски комуникации (АЕК) во април објави намера за спроведување постапка на јавен тендер со јавно наддавање за нов мрежен оператор во државава, а на барање на „Оне Македонија телекомуникации“, фирмата што унгарската телеком-компанија „Фор-ај-џи“ ја регистрира во државава по објавата за влез на македонскиот телекомуникациски пазар.
Намерата за спроведување јавен тендер, како што додаваaт од АЕК, е по сопствена иницијатива и врз основа на пристигнатo барање од „Оне Македонија телекомуникации“ од 16.4.2025 година.
Влезот на трет мобилен оператор во земјава беше најавен минатата година, а дека има интерес од унгарската „Фор-ај-џи“ обелоденија од Министерството за транспорт по официјалната средба на министерот Николоски со претставници на компанијата во Унгарија.