Од Европската Унија, пак, по повод денешниот ден, порачаа оти Европа ќе стане првиот климатски неутрален континент до 2050 година, во согласност со Европскиот зелен план
На Денот на планетата Земја кој се одбележува денес – 22 април, Обединетите нации предупредија оти Земјата се соочува со „тројна планетарна криза“ која опфаќа нарушување на климата, губење на природата и биодиверзитетот и отпадно загадување.
„Оваа тројна криза е закана за добросостојбата и преживувањето на милиони луѓе ширум светот. Темелот за среќен и здрав живот се чиста вода, свеж воздух и стабилна и предвидлива клима – сето ова е нарушено и ги загрозува целите на одржлив развој“,
кажа Антонио Гутереш, генералниот секретар на ОН во видеопораката на Денот на планетата Земја 2022.
Гутереш додаде дека сè уште има надеж и потсети оти пред 50 години во Стокхолм светот се собра на клучната конференција за животната средина од која започна глобалното климатско движење.
По повод денешниот ден, од Европската Унија порачаа оти Европа ќе стане првиот климатски неутрален континент до 2050 година во согласност со Европскиот зелен план.
„Нашата посветеност е климатски неутрален континент до 2050 година. Со нашиот Европски зелен план, инвестираме во нашата планета за да се бориме против ефектите од климатските промени. Секој напор е важен“,
стои во објавата на Европската комисија на Твитер.
🌍 Todays is Mother #EarthDay!
— European Commission 🇪🇺 (@EU_Commission) April 22, 2022
Our commitment: a climate-neutral continent by 2050.
With our #EUGreenDeal we are investing in our planet to combat the effects of climate change.
Every effort counts to stop it.
More info➡️ https://t.co/MjQ7fpgdka pic.twitter.com/GB5HwGZ8ml
Денот на планетата Земја официјално се одбележува од 1992 година, кога за време на Конференцијата на ОН за животна средина и развој во Рио де Жанеиро, на која присуствуваа голем број владини и невладини претставници, беше промовирана долгорочна програма за промовирање на одржлив развој.