Израелскиот кабинет за безбедност утрово одобри план за заземање на градот Газа, што означува нова ескалација во 22-месечната офанзива на Израел, која започна како одговор на нападот на Хамас на 7 октомври 2023 година
Организацијата на обединети нации (ООН) силно се спротивставува на проширувањето на израелската офанзива во Појасот Газа, објави ДПА повикувајќи се на синоќешната изјава на заменик-портпаролот на ООН, Фархан Хак, во Њујорк.
„Категорично сме против каква било ескалација на конфликтот. Тоа е веќе исклучително деструктивно“,
рече Хак.
Според Хак, конфликтот веќе предизвикал повеќе од 60 000 жртви во речиси двегодишните борби.
„Постои можност за огромно човечко страдање, вклучително и потенцијално гладување, што би можело да се влоши ако конфликтот ескалира“,
додаде портпаролот на ООН.
Неговите коментари дојдоа откако израелскиот кабинет за безбедност се состана за да разговара за понатамошните чекори во војната во Појасот Газа.
Израелскиот кабинет за безбедност утрово одобри план за заземање на градот Газа, што означува нова ескалација во 22-месечната офанзива на Израел, која започна како одговор на нападот на Хамас на 7 октомври 2023 година.
Кабинетот на Нетанјаху објави соопштение во кое детално се опишани одобрените планови за окупирање на градот Газа и петте принципи за завршување на војната, за кои се вели дека се усвоени со мнозинство гласови.
„Израелските одбранбени сили ќе се подготват да ја преземат контролата врз градот Газа, а воедно да обезбедат хуманитарна помош за цивилното население надвор од борбените зони“,
се вели во соопштението, детално наведувајќи ги следните принципи за завршување на војната.