Една членка има одреден став по ова прашање, додека значителен број членки имаат поинакви ставови, одговори претседавачот со Советот за безбедност
Претседавачот на Советот за безбедност на ООН, Дијан Трасјах Џани, го отфрли барањето на администрацијата на американскиот претседател Доналд Трамп за повторно воведување санкции кон Иран откако беа укинати во 2015 година според нуклеарниот договор.
Џани, амбасадор во ООН од Индонезија, која е на чело на ротирачкото претседателство на СБ овој месец, најави отфрлање на санкциите како одговор на прашањето поставено од Русија и Кина.
Тој рече дека нема консензус во Советот за безбедност на ОН кога станува збор за повторно воведување санкции за Техеран.
„Една членка има одреден став по ова прашање, додека значителен број членки имаат поинакви ставови“,
рече Џани за време на виртуелниот состанок на Советот за безбедност за Блискиот исток.
Како што пренесуваат странските агенции, тоа значи дека Советот за безбедност на ОН, за време на едномесечното претседателство на Индонезија, нема да презема понатамошни активности по барањето на САД за повторно воведување санкции за Иран.