На истрага за случајот повикаа и Соединетите Американски Држави. Портпаролот на Советот за национална безбедност на Белата куќа, Шон Савет вели дека Вашингтон е длабоко вознемирен од трагичната смрт на американската државјанка
Обединетите нации (ОН) повикаа на целосна истрага по убиството на млада жена со американско и турско државјанство за време за време на протестот кој се одржа вчера во окупираниот Западен Брег, јавуваат светските медиуми.
Дваесет и шестгодишната Ајсенур Езги Ејги, според информациите што ги објавија локланите медиуми, била застрелана од израелските сили додека учествувала на протестот против проширувањето на еврејските населби во градот Беита, во близина на Наблус на Западниот Брег, пренесува Би-би-си.
Од израелската војска соопштија дека ги разгледуваат извештаите дека еден странски државјанин бил убиен како резултат на истрели во областа.
Лице присутно на протестот за светскиот сервис на на Би-би-си изјавил дека слушнал два истрели на протестот.
„Би сакале да видиме целосна истрага во врска со околностите и одговорност за случајот. Цивилите мора да бидат заштитени во секое време“,
изјави Стефан Дујарик, портпарол на генералниот секретар на ОН, во реакцијата по убиството.
На истрага за случајот повикаа и Соединетите Американски Држави. Портпаролот на Советот за национална безбедност на Белата куќа, Шон Савет, вели дека Вашингтон е длабоко вознемирен од трагичната смрт на американската државјанка.
„Се обративме до владата на Израел за да побараме повеќе информации и истрага за инцидентот“,
изјави Савет.
Еврејско-израелскиот активист Џонатан Полак, кој учестувал на протестот, за програмата Њусхур на светскиот сервис на Би-Би-Си изјави дека видел војници на кров од објект како нишанат, по што слушнал два одвоени истрели со временско растојание од секунда или две меѓу нив.
„Помогни ни. Ни треба помош. Ни треба помош. Истрчав кон нив“,
рекол тој.
Потоа, како што изјавил, ја видел Ејги како лежи на земја под маслиново дрво, крварејќи од главата.
„Ја ставив раката зад нејзиниот грб за да се обидам да го запрам крварењето. Го кренав погледот, имаше јасна линија на видик меѓу војниците и местото каде што бевме. Го проверив нејзиниот пулс и беше многу, многу слаб“,
изјавил тој.
Американскиот државен секретар Ентони Блинкен изрази жалење за „трагичната загуба“, додека турскиот претседател Реџеп Таип Ердоган ја нарече израелската акција „варварска“, пренесува британскиот национален сервис.
Турското Министерство за надворешни работи соопшти дека Ејги била „убиена од израелски окупациски војници во градот Наблус“.
Пред да отпатува на Блискиот Исток, Ејги неодамна дипломирала на Универзитетот во американскиот град Сиетл.
Од израелските одбранбени сили (ИДФ), пак, во соопштение велат дека за време на активноста на безбедносните сили во непосредна близина на областа Беита, тие одговориле со отворање оган кон поттикнувач на насилни активности кој фрлал камења врз нивните припадници и претставувал закана за нив.
Во изминатите 50 години, Израел изгради населби на Западниот Брег и Источен Ерусалим, каде што сега живеат повеќе од 700 000 Евреи.
Населбите се сметаат за нелегални според меѓународното право.