23-годишна жена од Волково, професионален војник во Армијата на Република Северна Македонија, е осомничена дека примила поткуп за на свој колега да му овозможи да биде примен на конкурс за офицери. Обвинителството бара притвор, а за случајот претходно информира и министерката за одбрана Славјанка Петровска
Основното јавно обвинителство Скопје донесе наредба за спроведување истражна постапка против 23-годишна припадначка на Армијата на Република Северна Македонија која побарала поткуп од 3 000 евра од свој колега, професионален војник, за да биде примен на конкурс за офицери.
Како што соопшти Обвинителството, за жената која е од Волково, постои основано сомнение дека сторила кривично дело примање поткуп од член 357, став 1 од Кривичниот законик.
„Осомничената на 18 и 19 мај, како професионален војник, директно побарала и примила парични средства за да се изврши службено дејствие што не би смеело да се изврши. Парите ги побарала од нејзин колега, исто така професионален војник во Армијата на РСМ, за да му ‘помогне’ при изборот на јавно објавениот конкурс за прием на офицери“,
соопшти Обвинителството.
По објавување на првичната и во очекување на конечната листа на кандидати, осомничената го контактирала колегата и му кажала дека може да му помогне за тој да ги исполни условите за да биде избран за офицер.
„Но, за тоа побарала тој да плати 3 000 евра кои наводно таа ќе ги проследи до лице кое има влијание при изборот. На 19 мај тие се сретнале во кафе-бар при што осомничената уште еднаш потврдила дека ќе ги прими парите. Заедно се упатиле кон нејзиниот автомобил каде војникот ѝ предал 2 400 евра, претходно криминалистичко-технички обработени. Веднаш потоа осомничената била лишена од слобода“,
стои во соопштението на Обвинителството.
Обвинителството бара притвор за осомничената поради можноста од попречување на кривичната постапка со влијание врз сведоците, како и повторување на кривичното дело.
Обвинителството ја испитува можната инволвираност и на други лица во настанот.
Претходно за настанот информира и министерката за одбрана Славјанка Петровска, која на Фејсбук објави дека е приведена припадничка на Армијата поради земање поткуп од 3 000 евра.