Станува збор за проширување на постапката за кражбата за која пред десетина дена Обвинителството поднесе обвинение против три лица
Основното јавно обвинителство Скопје обезбедило докази кои даваат основано сомнение дека полициски службеник вработен во Министерството за внатрешни работи (МВР) бил соучесник во кражбата на повеќе километри високоенергетски и среднонапонски кабли во кругот на фабриката „Железара“ во Скопје.
Како што информираа од Јавното обвинителство вечерва, ОЈО Скопје донело наредба за спроведување истражна постапка против полицискиот службеник за кривичното дело тешка кражба од член 236 став 4 во врска со став 1 точка 1 од Кривичниот законик (КЗ).
Станува збор за проширување на постапката за кражбата за која пред десетина дена Обвинителството поднесе обвинение против три лица.
„Сите тие се товарат дека заедно од објектот на „Полуконти –ИГМ“ и подземните тунели низ кои поминуваат кабли за напојување со електрична енергија одзеле повеќе километри високоенергетски и среднонапонски кабли во сопственост на оштетените правни лице АД ЕСМ – Електрани на РСМ – Подружница енергетика Скопје и МакСтил АД Скопје во вкупна вредност од околу 440 илјади евра“,
се вели во соопштението од Јавното обвинителство на Република Северна Македонија.
Според краткиот опис на делото, осомничените откако со апарат ќе се увереле дека каблите не се под напон, со батериска брусалка ги сечеле и ги складирале до влезот од тунелите.
Поради нивните дејствија, како што додаваат од Обвиниттелствоот, на 9 април годинава настанал и пожр во трафостаницата ТС „Југ“ со што била предизвикана и дополнителна штета на јавните инсталации и за чие санирање биле потребни повеќе од 100 илјади евра.
Дополнително, поради кражбите не било реализирано и планираното производство и дистрибуција на електрична енергија кон крајните корнисници во периодот на санација на дефектите што чинело 60 илјади евра.
Надлежниот јавен обвинител до судија на претходна постапка од Основниот кривичен суд Скопје доставил предлог на осомничениот полициски службеник да му биде одредена мерка притвор.
Тројцата негови соизвршители против кои претходно беше покренато обвинение исто така се обезбедени со мерка притвор по предлог на Обвинителството, поради опасноста од бегство, можноста за влијание врз сведоци и ризикот да го повторат делото.