Постапката што ја покрена скопското обвинителство против 43-годишникот се однесуваа на кривичните дела насилство и спречување на службено лице во вршење службено дејствие
Основното јавно обвинителство (ОЈО) Скопје побара притвор за осомничениот напаѓач што синоќа насилно упадна во студиото на редакцијата на „Инфомакс“ за време на емитувањето на поткастот „Тешки муабети“. Со оглед на информациите во кривичната пријава за претходната здравствена состојба на осомничениот, од ОЈО Скопје додаваат дека во текот на постапката ќе биде наредено и негово психијатриско вештачење.
Постапката што ја покрена скопското обвинителство против 43-годишникот се однесуваа на кривичните дела насилство и спречување на службено лице во вршење службено дејствие.
„Осомничениот делото го извршил синоќа, во просториите на студиото на ‘Инфомакс’, во моменти додека се емитувала онлајн програма во живо. Тој ја обил надворешната врата во дворот, како и уште две врати на објектот, влегол внатре и започнал со насилничко и агресивно однесување, заканувајќи им се на двајца новинари, гостин и уште еден вработен дека ќе ги убие поради искажани навреди за премиерот“,
наведуваат од Обвинителството.
Кога влегол во просторијата каде што се емитувала емисијата, осомничениот почнал да замавнува и да пробува да се пробие за да дофати еден од новинарите. Фрлал со чаши по нив, ги влечел и туркал додека не го изнеле надвор и не повикале полиција.
„Како резултат на настанот, новинарите биле спречени во извршувањето на нивната службена должност, односно морале да го прекинат емитувањето на програмата. Исто така, од чинот на насилство сите присутни се почувствувале исплашени и загрозени за своите животи и за својата безбедност“,
додаваат од ОЈО Скопје.
Претходно денеска МВР објави дека 43-годишен скопјанец Г. С. е приведен откако синоќа насилно упаднал во студиото на „Инфомакс“. Оттаму информираа дека по приведувањето, било утврдено дека станува збор за лице со здравствени проблеми, кое претходно било спроведувано во Психијатриската болница „Скопје“ во Бардовци.