Од Обвинителство велат дека надлежните јавни обвинители ќе постапат согласно законските надлежности во поглед на мерките за обезбедување кога ОЈО ГОКК ќе добие известување дека осомничениот е недостапен за органите на прогонот
До Обвинителството нема доставено документ дека осомничениот поранешен директор на „Електрани на Северна Македонија“ (ЕСМ), Васко Ковачевски, е недостапен на органите на прогонот, реагираат денеска од Основното јавно обвинителство за гонење организиран криминал и корупција (ОЈО ГОКК).
Реакцијата на Обвинителството доаѓа откако денеска министерот за внатрешни работи Панче Тошковски рече дека е вчудовиден што Јавното обвинителство не му одредило притвор, како најстрога мерка од Законот за кривична постапка, на поранешниот директор на ЕСМ, Васко Ковачевски, кој е осомничен во случајот „Адитив“.
Од Обвинителството велат дека надлежните јавни обвинители ќе постапат согласно законските надлежности во поглед на мерките за обезбедување кога ОЈО ГОКК ќе добие известување дека осомничениот е недостапен за органите на прогонот.
Во соопштението од Обвинителството се појаснува дека од Министерството за внатрешни работи вчера до ОЈО ГОКК доставиле известување за постапување по сите 77 наредби за претрес издадени од скопскиот Кривичен суд. Во известувањето, се додава во соопштението, во точката што се однесува на Ковачевски било наведено дека тој во моментот на претресот не бил пронајден на домашната адреса и не бил забележан подолг период од страна на соседите.
„Законот за кривична постапка е јасен и дециден во вакви случаи – МВР треба најпрво да го извести судот кој ќе побара од полицијата да ја утврди достапноста на лицето. Доколку притоа се утврди дека лицето е недостапно, судот известувањето на МВР ќе го достави на запознавање, во случајов до ОЈО ГОКК, и ќе побара Обвинителството да се произнесе во однос на предлогот за определување на мерките на обезбедување“,
се вели во соопштението од Обвинителството.
До денес, додаваат оттаму, Основниот кривичен суд – Скопје нема доставено ваков документ до Обвинителството и предметните обвинители не можат прескокнувајќи постапки и институции да носат предлози или одлуки надвор од нивните законски овластувања.
Претходно попладнево од Кривичниот суд информираа дека е отфрлен предлогот за определување мерки за претпазливост против поранешниот директор на ЕСМ, Васко Ковачевски, поднесен на 11 декември годинава, откако добил известување од Министерството за внатрешни работи (МВР) дека тој не е достапен.
Причините за отфрлањето на предлогот биле дека осомничениот Ковачевски не бил достапен за органите на прогон, тој не бил уапсен и не се произнел во судот.
За поранешниот директор на ЕСМ, Ковачевски, денеска министерот за внатрешни работи Панче Тошковски рече дека е вчудовиден што Јавното обвинителство не му одредило притвор, како најстрога мерка од Законот за кривична постапка.
Тошковски рече дека МВР и усно и писмено го известило Обвинителството оти ексдиректорот на ЕСМ е недостапен за органите на прогонот, но оти, за жал, јавниот обвинител што го водел предметот во ОЈО ГОКК одлучил дека не треба да бара мерка притвор.
Инаку, на 11 декември годинава по предлог на ОЈО ГОКК, скопскиот кривичен суд им определи 30-дневен притвор на осуммина од вкупно 23 осомничени во случајот „Адитив“. Меѓу нив е и ексдиректорот на ЕСМ, Васко Стефанов.
Мерки за претпазливост Кривичен му определи и на осомничениот поранешен директор на ЕСМ, Васко Ковачевски, кој во моментов е недостапен за органите на прогонот и е надвор од државата.