Основното јавно обвинителство Дебар, врз основа на кривични пријави против три лица, бара од судот парични казни од по 1 000 евра бидејќи двајца од нив и покрај забраната ги отвориле своите локали каде што послужувале гости, додека третиот се обидел да го напушти Дебар, кој е прогласен за кризен регион.
Сите се товарат дека сториле кривично дело казниво според член 206 од КЗ.
Двајца од обвинетите, кои се сопственици на угостителски објекти, спротивно на член 1 точка 9 од одлуката со која се забранува работата на кафетерии, барови, клубови, казина и спортски обложувачници, ги отвориле и примиле и послужувале гости. Третиот обвинет, пак, преку спореден пат во близина на Бошков мост, се обидел да ја избегне полициската контрола и да го напушти подрачјето на Општина Дебар. Откако се приклучил на регионалниот пат Скудриње-Гостивар бил запрен од полициски службеници и вратен назад.
Обвинителството за тројцата бара парична казна во висина од 10 до 100 дневни глоби.