Оттаму додаваат дека во текот на истражната постапка надлежниот јавен обвинител ќе преземе мерки и дејствија за да ги открие лицето или лицата од кои осомничениот ја набавил дрогата, како и потенцијални сведоци на транспортот
Битолското Основно јавно обвинителство отвори истрага и бара притвор за 36-годишниот прилепчанец што беше уапсен вчера откако во автомобилот што го управувал полицијата пронајде над 30 килограми марихуана.
Обвинителството го товари осомничениот за кривичното дело неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик (КЗ). Предвидената казна според овој став од наведениот член од КЗ изнесува од три до 10 години затвор.
Во кусиот опис на делото, од Јавното обвинителство информираат дека осомничениот бил лишен од слобода на магистралниот пат А3, односно Битола – Прилеп, во близина на кружниот тек за селото Тополчани. Таму полициски екипи запреле и извршиле преглед на автомобил „фолксваген голф“ со прилепски регистарски ознаки во кој 36-годишниот прилепчанец пренесувал две патни торби.
„Во внатрешноста на торбите се наоѓале вкупно 35 најлонски пакувања наркотичната дрога марихуана. Вкупната тежина на дрогата откриена во багажниот простор на автомобилот изнесува 32,575 грама“,
велат од Јавното обвинителство.
Оттаму додаваат дека во текот на истражната постапка, надлежниот јавен обвинител ќе преземе мерки и дејствија за да ги открие лицето или лицата од кои осомничениот ја набавил дрогата, како и потенцијални сведоци на транспортот.
Инаку, Обвинителството бара притвор за осомничениот поради опасност од бегство, влијание врз сведоци, можноста да го повтори делото и да прикрие и уништи определени докази.
Од Министерството за внатрешни работи (МВР) вчера соопштија дека марихуаната во земјава била внесена од соседна Албанија и осомничениот требало да ја транспортира до државната граница со Грција. Таму дрогата требало да биде предадена за понатамошен транспорт до Турција.
Како што информираа оттаму, осомничениот што ја пренесувал дрогата пред 20 дена излегол од затвор, каде издржувал казна од три и пол години поради недозволена трговија со дрога.
Според МВР случајот е реализиран во рамки на засилените активности во борбата против недозволената трговија со дрога и како што наведоа оттаму, во вчерашната акција учествувале полициски службеници од Одделот за криминалистичка полиција, Секторот за внатрешни работи (СВР) Битола и Специјалната антитерористичка единица (САЕ) „Тигар“.