Ракетата „Долг марш 5Б“ беше лансирана на 24 јули за да испорача лабораториски модул до новата кинеска вселенска станица во изградба во орбитата. НАСА тврди дека Пекинг не споделил „специфични информации за траекторијата“ кои се потребни за да се утврди каде би можеле да паднат остатоците
Дел од огромна кинеска ракета „Долг марш 5Б“, над која пред некој ден беше изгубена контрола, падна на Земјата помеѓу Индискиот и Тихиот Океан, соопштија американските и кинеските официјални лица.
Кинеската национална вселенска агенција (ЦНСА) соопшти дека најголемиот дел од ракетата изгорел во атмосферата и додаде дека местото каде ракетата влегла во атмосферата е над Сулското Море во Тихиот Океан.
Сепак, НАСА тврди дека Пекинг не споделил „специфични информации за траекторијата“ кои се потребни за да се утврди каде би можеле да паднат остатоците.
„Сите вселенски нации треба да ги следат воспоставените најдобри практики и да го дадат својот дел за да го споделат овој тип на информации однапред за да овозможат веродостојни предвидувања за потенцијалниот ризик од удар на отпадот“,
рече администраторот на НАСА, Бил Нелсон.
Тој додаде дека „тоа е од суштинско значење за одговорно користење на вселената и за обезбедување на безбедноста на луѓето овде на Земјата“.
Кинеската амбасада во Вашингтон, пак, не го коментираше случајот веднаш. Претходно оваа недела, Кина соопшти дека внимателно ќе ги следи остатоците од ракетата но посочи дека тие претставуваат мал ризик за кој било на Земјата.
За падот на дел од ракетата преку социјални мрежи известија и корисниците во Малезија давајќи информации дека виделе објект кој личи на ракетни остатоци.
Ракетата „Долг марш 5Б“ беше лансирана на 24 јули за да испорача лабораториски модул до новата кинеска вселенска станица во изградба во орбитата, што е трет лет на најмоќната кинеска ракета од нејзиното прво лансирање во 2020 година.