Осомничениот е во бегство. Доставен е и предлог за мерка притвор, што ќе започне да се применува по неговото пронаоѓање
Против 22-годишен битолчанец е поведена истражна постапка поради сомнение дека сторил кривично дело – разбојничка кражба, информира Основното јавно обвинителство (ОЈО) Битола.
Осомничениот на 23 јуни годинава влегол во фризерски салон во Битола и побарал пари од фризерот, кој одбил доброволно да му даде. Откако фризерот се оддалечил од фиоката каде што го чувал прометот од фризерските услуги, осомничениот ја отворил фиоката и ги зел речиси сите пари што биле во неа, односно 3 000 денари.
Се обидел да избега од салонот, но фризерот го фатил и се обидел да го спречи да замине додека не биде повикана полиција.
„Осомничениот му се заканил на оштетениот дека ќе го испрска со солзавец, по што го пуштил да замине со украдените пари“,
се вели во соопштението од ОЈО Битола.
Осомничениот сѐ уште е во бегство и полицијата трага по него.
Осомничениот и претходно е осудуван за исти и слични дела.
Во таа насока е доставен и предлог за мерка притвор, што ќе започне да се применува по неговото пронаоѓање.
Важни докази за настанот се исказите на оштетениот и на сведоците што во моментот на кражбата се наоѓале во фризерскиот салон, за што постои опасност осомничениот да влијае врз нив и на тој начин да ја попречи истражната постапка.
Предвид е земен и исказот на оштетениот, кој се чувствува загрозен и бара да биде заштитен од осомничениот во текот на постапката.