Од охридската полиција велат дека по документирање на случајот, против нив ќе бидат поднесени соодветни пријави по член 297-а од Кривичниот законик за безобѕирно управување со возило
Синоќа на улицата АСНОМ во Охрид се случила сообраќајна несреќа помеѓу три возила со охридски регистарски таблички. По несреќата, како што информираат од Секторот за внатрешни работи Охрид, биле одземени две возила, а полицијата поднела и пријави за двајца од тројцата возачи кои учествувале во судирот.
Несреќата се случила во 20:30 часот, кога дошло до судир помеѓу три автомобили со охридски регистарски ознаки „фолксваген амарок“, управуван од 24-годишниот В. В. М., „ланчија“, управувана од Ј. П. (37) и „мерцедес“, кој го возел П. Н. (35).
По извршениот увид, полицијата констатирала прекршоци кај двајца од учесниците. Кај 24-годишниот возач на „фолксвагенот“ се измерени 0,71 промили алкохол во крвта, а тој имал дури три активни забрани за управување со возило од „Б“ категорија.
При контролата, полицијата утврдила дека и возачот на „ланчијата“, 37-годишниот Ј. П., кој исто така учествувал во несреќата, имал една изречена забрана за возење.
Од СВР Охрид велат дека бил известен јавен обвинител по чии насоки биле одземени автомобилите на В. В. М. и на Ј.П.
„По документирање на случајот, против нив ќе бидат поднесени соодветни пријави по член 297-а од Кривичниот законик за безобѕирно управување со возило“,
додаваат од охридската полиција.