Мицкоски не наведе повеќе детали во врска со ваквите наводи и само додаде оти очекува работата да биде многу поголема од тоа што досега е реализирано
Запленетата марихуана во акцијата на МВР и на ОЈО ГОКК во изминатиот период, според премиерот Христијан Мицкоски е само почеток на работата, која, како што изјави денеска, ќе биде многу поголема.
Дека ова е само почеток, премиерот се повика на индициите што досега ги имаат, но и од истрагата што ја спроведува Министерството за внатрешни работи, во која како што спомена, без да наведе детали, предмет се и одредени телефони и одредени разговори.
„Ова е само почеток. Од тоа што го имаме како индиции, но и од тоа што Министерството за внатрешни работи го врши во истрагата, одредени телефони, одредени разговори итн., друг тип на докази, работата ќе биде многу, многу поголема“,
изјави премиерот одговарајќи на новинарски прашања по увидот во градежни активности на доградба на ООУ „Невена Георгиева – Дуња“ во Општина Кисела Вода.
Мицкоски кажа оти очекува на денешната седница на Владата да биде донесена одлука за вршење на проверки во сите правни лица и објекти кои имаат добиено лиценци за одгледување на марихуана за медицински цели.
Кажа дека денешната владина седница нема да ја води тој, туку со неа ќе претседава вицепремиерот за политички систем, Љупчо Димовски.
„Јас поради други активности нема да ја водам денешната седница, ќе ја води потпретседателот Димовски, но очекувам ваков тип одлуки да бидат донесени и во деновите што следат да се проверат сите оние компании коишто добиле на некаков начин лиценца за да ја вршат оваа дејност“,
рече премиерот.
Одговарајќи на новинарско прашање, тој кажа оти очекува во акцијата, покрај досегашните над 40 тони, да бидат запленети повеќе десетици тони марихуана, а повтори оти не би се изненадил ако се дојде до заплена од 100 тони.
Премиерот рече дека нема информации дека петте тони марихуана што беа запленети во Србија, по што тргна и акцијата во Македонија, биле изнесени од Македонија како пломбирана стока и со документи во кој бил наведен друг производ.
На прашањето кои функционери и кој министер овозможувале релативно лесно да се добиваат лиценци за одгледување марихуана за медицински цели, Мицкоски рече дека лесно може да се претпостави дека во одреден период министер тогаш бил и актуелниот лидер на СДСМ, Венко Филипче.
Во тој контекст, како што образложи премиерот, она што треба да се истражи, покрај лиценците, е донесувањето на правилникот со кој се дозволило да се одгледува канабис со послаб квалитет иако се знаело дека маслото што ќе се добие од него нема да може да се пушти во легална продажба.
„Лиценците се една работа, а втора работа е што е донесен правилник, којшто е ниво под законот, односно е подзаконски акт со кој се дозволува практично да се произведува цвет од канабис којшто не ги задоволува ГМП-нормите, и биле свесни дека тоа ќе се случи. И ако не ги задоволува тие норми, логично е дека со неговото користење или во процесот на екстракција маслото коешто се произведува не може да биде лиценцирано и да се најде во продажба, односно да биде пуштено во промет. Тоа им било многу јасно и на тие коишто го носеле тој правилник“,
вели премиерот.
Според него вистинското прашање е кои биле мотивите за носењето на таквиот правилник, ако се знаело дека маслото направено од цвет на канабис со послаб квалитет не може да излезе на легалниот пазар.
„И тука треба да се направи една сериозна истрага. Но, ова е само почеток, од тоа што го имаме како индиции, но и од тоа што Министерството за внатрешни работи го врши во истрагата, одредени телефони, одредени разговори итн. друг тип на докази, работата ќе биде многу, многу поголема“,
изјави премиерот.
Во акцијата на ОЈО ГОКК и МВР на територијата на Македонија досега се запленети над 40 тони дрога на повеќе локации во Скопје и во Струмица.
Од Обвинителството за организиран криминал и корупција (ОЈО ГОКК) во првото официјално соопштение за акцијата, објавено вчера, наведоа дека продолжуваат активностите во соработка со другите институции. Оттаму велат дека се сослушуваат и сведоци, во насока на прибирање релевантни докази и факти за постапката.
За утврдување евентуална поврзаност на случајот и потеклото на запленетата марихуана кај Крушевац, од ОЈО ГОКК велат дека се во комуникација со Обвинителството за организиран криминал на Србија.
Паралелно со постапувањето на надлежните институции во врска со акцијата продолжуваат и препукувањата меѓу владејачката ВМРО-ДПМНЕ и опозициската СДСМ за одделни аспекти на случајот, како и за тоа кај кого лежи одговорноста за случајот, кој засега, најверојатно сè уште е во фаза на предистрага.