„Доцна синоќа завршија сите рочишта во кои е изречена мерката, со што постапката за досега предложените мерки е завршена. Основниот суд во Кочани продолжува да постапува по предлозите и барањата на Обвинителството“, велат за „360 степени“ од Основниот суд Кочани
На поранешниот министер за економија Крешник Бектеши, ексдиректорот на Државниот пазарен инспекторат (ДПИ), Горан Трајковски и на уште 12 лица, судија на претходна постапка од Основниот суд во Кочани им одреди краткотраен притвор од 48 часа, во рамки на предистрагата на Обвинителството во врска со пожарот во кочанската дискотека „Пулс“, во кој загинаа 59 лица.
Од Основниот суд во Кочани за „360 степени“ потврдија дека завршила постапката и им е одреден краткотраен притвор од 48 часа на сите 14 лица за кои Јавното обвинителство ја бараше оваа мерка.
„Доцна синоќа завршија сите рочишта во кои е изречена мерката, со што постапката за досега предложените мерки е завршена. Основниот суд во Кочани продолжува да постапува по предлозите и барањата на Обвинителството“,
велат од судот во Кочани.
Како што информираат оттаму, за дел од одлуките за краткотраен притвор имало и жалби по кои одлучувал Кривичен совет на судот.
Од Основниот суд во Кочани не соопштија имиња на кои им е одреден краткотраен притвор од 48 часа, но потврдија дека станува збор за 14 лица.
На распит во Основниот суд во Кочани вчеравечер беа спроведени поранешниот министер за економија Крешник Бектеши, ексдиректорот на Државниот пазарен инспекторат, Горан Трајковски и уште едно лице.
Во Судот во Кочани Бектеши беше спроведен од полициската станица „Карпош“ во Скопје, каде што се наоѓаше кога беше повикан на распит.
Бектеши е приведен во врска со нелегалната лиценца за кабаре што ја имала фирмата „ММММ кафе“ ДООЕЛ Кочани за клубот „Пулс“ – документ кој бил издаден на 13 март 2024 година, кога со Министерството за економија раководи Крешник Бектеши, а потпишан од страна на тогашната државната секретарка Размена Чекиќ-Дуровиќ.