Советот за оценка на обвинителен акт во Основниот кривичен суд во Скопје во целост го одобрил обвинението за случајот со невладината организација „Меѓународен сојуз“ – Скопје, во кој се опфатени пет лица: Бојан Јовановски-Боки 13, како прв човек на невладината организација „Меѓународен сојуз“, пратеничката Фросина Ременски, заменик-претседателката на „Меѓународниот сојуз“, Јасна Мандиќ, таткото на Боки – Миле Јовановски и асистентката Христина Блажевска. Како правно лице обвинета е и невладината организација „Меѓународен сојуз“, чиј претседател е Боки.
„По веќе одобрениот обвинителен акт ќе биде оформен предмет кој согласно АКМИС-системот ќе биде распределен на понатамошно постапување кај судија од одделот за организиран криминал, а по насрочена главана расправа странките и јавноста ќе бидат дополнително известени“,
велат од судот.
Оценката на обвинителниот акт беше во рацете на советот на судијката Добрила Кацарска.
Боки во предметот е првообвинет за делата измама и перење пари. Ременски е обвинета за помагање на делото измама, а Мандиќ и Блажевска за помагање во двете дела.
Таткото на Боки, пак, е обвинет за помагање на делото перење пари, но и за неовластено изработување, држење, посредување и тргување со оружје бидејќи при претрес во неговиот дом биле пронајдени три полуавтоматски пиштоли и муниција за кои немал дозвола. За измама се гони и „Меѓународниот сојуз“.
„Во периодот од 8 јули 2017 година до 13 април 2018 година првообвинетиот, како претседател на обвинетата невладина организација, со намера за себе да прибави противправна имотна корист, ги искористил документите од невладината и довел и одржувал во заблуда две оштетени лица. Тој лажно прикажувал дека ќе обезбеди државно неизградено земјиште за изградба на Европски центар за возрасни лица и мобилен сервис, како и субвенции од страна на државата и оштетените вака доведени во заблуда на штета на својот имот му исплатиле преку Македонска авторска агенција износи кои надминуваат значителна вредност, и тоа 719 905 евра, односно 233 821 евра во денарска противвредност“,
пишува во обвинението.
Обвинетата асистентка и Мандиќ, според обвинителството, ги изготвувале договорите, ги подигале уплатените пари и му ги давале на рака на Боки и со умисла му помагале да ги пушти во оптек, иако знаеле дека потекнуваат од кривични дела. Мандиќ, исто така, иако немало легално покритие, добивала пари од Боки и ги уплаќала во вид на донација или по основ на позајмица на сметката на „Меѓународниот сојуз“.
Улогата на Ременски, според соопштението од обвинителството, била што таа со својот углед и авторитет го поддржувала Боки на средби со оштетените бизнисмени.
„Третообвинетата со својот углед и авторитет го поддржувала првообвинетиот на средбите со оштетените, давајќи му совети и упатства за да оштетените стекнат доверба во наводниот проект и однапред да уплатат одреден износ пари и да ги потпишат договорите“,
наведуваат од Обвинителството.