Владината портпаролка Марија Митева на денешната прес-конференција рече дека покрај медицинска и физиотерапевтска нега, во одморалиштето ќе биде обезбедена и социјална и психолошка помош
Владата работи на оперативен план кој треба да вклучи и план на медицински кадар што ќе треба да се грижи за пациентите во одморалиштето „Пониква“, кое ќе стане центар за рехабилитација за повредените од пожарот во Кочани, соопшти денеска портпаролката на Владата, Марија Митева.
Таа рече дека покрај медицинска и физиотерапевтска нега, во одморалиштето ќе биде обезбедена и социјална и психолошка помош и оти одморалиштето „Пониква“ кое е во сопственост на Министерството за внатрешни работи е во добра состојба и нема да има потреба од дополнителни зафати или ако има, тие ќе бидат минимални.
„Одморалиштето ‘Пониква’ располага со 27 соби и 56 легла, лоцирано е во природна и мирна средина, што го прави исклучително погоден простор за пациентите кои се веќе во фаза од лекувањето во која е неопходна физикална и работна терапија. Станува збор за пациенти кои се веќе стабилизирани, но кај кои постои реална потреба за понатамошен третман, сè со цел да се спречат и намалат долгорочните последици од изгорениците, како и други можни компликации коишто се поврзани со подолготрајното лекување“,
рече Митева.
Таа вели и оти ќе се направи план пациентите да бидат распределени во неколку групи и циклуси на терапија, со цел да се овозможи персонализиран пристап кон секој поединечен случај, во согласност со препораките на лекарите. Според медицинските проценки, пациентите не смеат да бидат изложени на директно сонце и на високи температури, а истовремено, не треба да се соочуваат со дополнителен физички напор.
„Пониква ги нуди сите предуслови за ваков тип на згрижување. Очекуваме во најкус можен рок да ги завршиме сите овие процедури и институционално да ги донесеме овие одлуки, медицинскиот кадар да контактира со сите пациенти, по што ќе почне сместувањето и спроведувањето на терапиите, согласно веќе утврдениот план. Оваа мерка е институционален одговор, израз на одговорност и посветеност кон секој поединец. Нема ништо поважно од човечкиот живот и достоинството на луѓето“,
кажа Митева.