Причината за ваквата одлука е тоа што Јошевска-Анастасовска, во текот на вчерашниот ден, на предлог на претседателката Гордана Сиљановска-Давкова, беше избрана за нов член на Судскиот совет
Главната расправа за предметот за пожарот во кочанското т.н. кабаре „Пулс“, во кој животот го загубија 63 лица, е отповикана поради промени во тимот на одбраната на еден од обвинетите.
Како што информираат од Основниот кривичен суд Скопје, утрешното рочиште е отповикано по барање на адвокатката Сузана Јошевска-Анастасовска, која е бранител на поранешниот директор на Дирекцијата за заштита и спасување (ДЗС), Аднан Џаферовски.
Причината за ваквата одлука е тоа што Јошевска-Анастасовска, во текот на вчерашниот ден, на предлог на претседателката Гордана Сиљановска-Давкова, беше избрана за нов член на Судскиот совет. Заради исполнување на правото Џаферовски да ангажира нов бранител кој ќе има време да се запознае со предметот утрешната расправа се отповикува. Судењето е закажано да продолжи на следниот, претходно утврден термин, на 26 јануари годинава.
Јошевска-Анастасовска како бранител на Џаферовски на рочиштето кога се изнесуваа воведните зборови, рече дека ова обвинение „не нѐ става во судска постапка туку во замка, каде треба да се снаоѓаме во хаос кој настанот во Кочани го претвори во каталог, а не во потрага по правда“.
Таа посочи на неколку моменти од обвинението, кое, според неа, го прават несериозно и незасновано на факти.
Судењето за пожарот во „Пулс“ во Кочани се наоѓа во доказна постапка и требаше да продолжи со искази од петмина сведоци на Обвинителството.
За пожарот во Пулс се обвинети 35 физички и три правни лица. Меѓу нив се сопственикот на „Пулс“, негови блиски, инспектори на државни институции, поранешни министри и припадници на агенцијата што го обезбедувала т.н. кабаре и нејзиниот сопственик.
На почетокот на судскиот процес сите се изјаснија дека не се чувствуваат виновни и ја оспорија тезата на одбраната дека има каузална, односно причинско-последична врска меѓу нивните дејствија и причината за смртоносниот пожар