Денеска во Кавадарци се одржа протест на кој беа побарани правда и одговорност за загинувањето на 22-годишната Фросина Кулакова во сообраќајната несреќа што се случи во средата (29 јануари) на булеварот „Партизански одреди“ во Скопје. Сестрата на загинатата девојка побара одговорност и за таткото на возачот и за судијката Даниела Алексовска-Стојановска
Сестрата на загинатата Фросина Кулакова, Росица, денеска од протестот во Кавадарци порача дека правда за Фросина мора да има и посака ваков случај никому да не му се повтори.
Таа својот говор го започна со зборовите дека општеството е огледало на вредностите што ги носат оние што го водат, а децата се најчистиот одраз на своите родители.
„Не може да се очекува чесно и одговорно управување од луѓе кои не успеале да ги всадат основните морални и општествени вредности дури ни во сопствениот дом. Доделувањето државни функции не смее да се сведува само на формални образовни критериуми. Јавните функции мора да ги извршуваат луѓе со интегритет, кои своите карактери и вредности ги покажале и во сопствениот живот. Како граѓани, како родители и како дел од заедницата, оној што не успеал да го воспита сопствениот наследник да ги почитува законите, да разликува добро од зло и да живее чесно, не може да бара доверба да управува со државата. Напротив, ваквите лица не смеат да добијат јавна функција. Тие треба да одговараат за своето дејствување, но и за криминалните постапки на своите помлади полнолетници“,
рече Кулакова.
Таа побара одговорност и за таткото на возачот и за судијката Даниела Алексовска-Стојановска.
„Ние за Фросина бараме правда, не само од убиецот, бараме правда и од таткото. Бараме да се затворат таткото Зоран Јованов и судијката Даниела Алексовска-Стојановска, кои не излегоа јавно да изразат сочувство кон семејството, туку кукавички се кријат и бришат профили на социјалните мрежи“,
вели таа.
Викторија Недева се обрати на протестот во име на другарките на загинатата Фросина.
„Нема зборови кои можат да ја изразат болката која ја чувствуваме од твојот ненадеен замин. Ти, која ја боеше секоја секунда со нас со твојата светлина, љубов, замина на најсуровиот можен начин. Но, знаеме дека со твојата енергија, насмевка и позитивен карактер, светот имаше нешто уникатно. Ти беше не само моден дизајнер, ти беше личност која успеваше да ги спои сите бои и да ги претвори во нешто што ќе остане во срцата на сите кои те познаваа“,
рече Недева.
Протестот под паролата „Правда за Фросина“ се одржа во центарот на Кавадарци од каде што полетаа 22 балони со името Фросина, колку што години имаше таа. Присутните оддаваа почит со палење свеќи и побараа правда и одговорност.
Граѓаните имаа истакнато транспаренти меѓу кои „Фросина сме сите ние“, а другарките порачаа „Патувај високо Фроси, твоите креации ќе бидат сега за ангелите“.
Инаку, во средата (29 јануари) се случи тешка сообраќајна несреќа на булеварот „Партизански одреди“ во Скопје во која загина 22-годишната Фросина Кулакова. Во неа удри 20-годишен возач за кој подоцна беше објавено дека нема возачка дозвола, а има историја на кривични дела.
Ова предизвика гнев кај граѓаните кои се собраа на протести на местото на несреќата и во родниот град на Кулакова, Неготино. Побараа одговорност и за судијката која многумина ја обвинуваат дека претходно го спасила од притвор проблематичниот возач.