Пендаровски и Шекеринска се поклонија пред комплексот „Карпалак“ во центарот на Прилеп посветен на Горан Миновски, Сашо Китаноски, Веби Рушитоски, Бранко Секулоски, Љубе Грујоски, Нане Наумоски, Ердован Шабаноски, Марко Деспотоски, Пеце Секулоски и на Дарко Велјаноски, каде се одржа централното одбележување
Во Прилеп денеска беше и претседателот на ВМРО-ДПМНЕ Христијан Мицкоски кој рече дека приоритет на ВМРО-ДПМНЕ како идна влада ќе биде токму тоа на достоинствен начин да се чествува жртвата
Претседателот Стево Пендаровски, министерката за одбрана Радмила Шекеринска и надворешниот соработник за одбрана на премиерот Зоран Заев, Драган Василевски денеска им оддадоа почит на десетмината армиски резервисти кои пред 20 години загинаа кај месноста Карпалак.
Пендаровски и Шекеринска се поклонија пред комплексот „Карпалак“ во центарот на Прилеп посветен на Горан Миновски, Сашо Китаноски, Веби Рушитоски, Бранко Секулоски, Љубе Грујоски, Нане Наумоски, Ердован Шабаноски, Марко Деспотоски, Пеце Секулоски и на Дарко Велјаноски, каде се одржа централното одбележување на две децении од загинувањето на прилепските бранители и каде оддадоа почит и положија цвеќе бројни делегации, бранители и претставници на дипломатскиот кор.
Во нивна чест беше одржана и панихида во цркавата „Света Петка“ во населбата Точила во Прилеп.
„За да имате доблест да гледате во иднината, мора да ги цените, да ги одбележувате и да се сеќавате на жртвите направени во минатото. И денеска затоа сме тука во Прилеп, да се сетиме на десетмината прилепски бранители кои не се веќе со нас. Да го почитуваме нивното дело, да ја цениме и денеска нивната храброст за да покажеме достојна почит кон сите семејства кои ги изгубија своите најмили“,
рече Шекеринска.
Бранителите и натаму чекаат споменик кај Карпалак
И денеска делегации положуваа цвеќе пред спомен плочата поставена на банкината од автопатот Скопје -Тетово. Оние кои го преживеаја нападот и по 20 години се разочарани што тука нема споменик за оние кои го положија животот во одбрана на татковината.
Некои се пожалија и дека државата ги заборавила и дека за нив ништо не е направено во изминатите години.
МицкоскиПриоритет ќе ни биде достојно чествување
Во Прилеп денеска беше и претседателот на ВМРО-ДПМНЕ Христијан Мицкоски, кој положи цвеќе на споменикот на загинатите кај Карпалак.
Одговарајќи на новинарско прашање, тој рече дека приоритет на ВМРО-ДПМНЕ како идна влада ќе биде токму тоа на достоинствен начин да се чествува жртвата на луѓето кои што животот го положиле за она кое што денеска ние го живееме.
„Апсолутно, затоа и го спомнам лицемерието на претставниците на локалната самоуправа и на власта. Апсолутно еден од приоритетите на ВМРО-ДПМНЕ како идна влада ќе биде токму тоа на достоинствен начин да ја чествуваме жртвата на нашите предци, на луѓето кои што животот го положиле за она кое што денеска ние го живееме“,
изјави Мицкоски.
На 8 август 2001 година на автопатот Скопје-Тетово во близина на селото Групчин кај месноста Карпалак од заседа беше нападнат конвој на Армијата, при што загинаа десет армиски припадници.