На новинарско прашање дали доколку се потврди политичка одговорност ќе се бара и друг вид одговорност од страна на Анкетната комисија и дали во неа ќе бидат инволвирани сегашни и поранешни директори на Онкологија, како и други функционери, Мизрахи рече дека сите релевантни институции и функционери секако ќе бидат повикани на разговор доколку Комисијата одлучи такво нешто
За утре е закажана првата седница на Анкетната комисија за случајот во ЈЗУ Универзитетска клиника за радиотерапија и онкологија, најави пратеничката од редовите на ВМРО-ДПМНЕ, Рашела Мизрахи, која е и претседател на Комисијата.
Мизрахи вели дека комисијата ќе биде надлежна за утврдување на хронологијата на настаните и околностите во ЈЗУ Универзитетска клиника за радиотерапија и онкологија, дали со скандалот се загрозени основите човекови права на пациентите коишто се лекувале, како и дали има политичката одговорност.
„Ќе се изготват заклучоци и препораки кои ќе имаат за цел да поведат постапка за утврдување на одговорност на носителите на јавните функции и спречување понатамошна злоупотреба, но и системски подобрувања на дефектите во таа клиника и целокупниот здравствен систем“,
рече Мизрахи.
Од денеска, како што рече Мизрахи, официјално од страна на генералниот секретар се назначени и собраниските соработници и службеници кои ќе бидат дел од оваа анкетна комисија, со што целосно се исполнети условите за почеток со работа.
На новинарско прашање дали доколку се потврди политичка одговорност ќе се бара и друг вид одговорност од страна на Анкетната комисија и дали во неа ќе бидат инволвирани сегашни и поранешни директори на Онкологија, како и други функционери, Мизрахи рече дека сите релевантни институции функционери секако ќе бидат повикани на разговор доколку одлучи комисијата такво нешто.
Пратениците, на вчерашната седница, со 96 гласа „за“ и без „против“ или „воздржани“, ја усвоија одлуката за избор на претседател и членови на Анкетната комисија во врска со скандалот за злоупотреба на лекови од Клиниката за онкологија и нивно препродавање на црниот пазар, кој го обелоденија дел од медиумите.
Анкетната комисија брои 12 членови и исто толку заменици.
Членови на Комисија ќе бидат пратениците од ВМРО-ДПМНЕ и коалицијата – Антонијо Милошоски, Гордана Сиљановска-Давкова, Иванка Василевска, Љупчо Пренџов и Петар Ристески, пратеници од СДСМ и коалицијата – Даниела Маркоска, Ненад Коциќ, Мартин Костовски и Марија Георгиевска, пратениците Арбен Зибери и Бедри Фазли од ДУИ и Ремзи Мехмеди од Алијанса за Албанците.
За нивни заменици, пак, избрани се Дајанчо Ефтимов, Дафина Стојаноска, Драган Ковачки, Тони Јаревски, Зоран Коцевски од ВМРО-ДПМНЕ, Миле Талевски, Маја Морачанин, Бети Рабаџиевска Наумовска и Соња Мираковска од СДСМ и коалицијата, Бајрам Кадрија и Берат Ајдари од ДУИ и Артина Казими од Алијанса за Албанците.
Одлуката за формирање на Анкетната комисија беше донесена на предлог на ВМРО-ДПМНЕ.