„Зошто во СДСМ би се нашле засегнати и повикани за коментар за апликација пред ЕПЧС во која се бара да се утврди повреда на правото за правично судење која ја сторила некоја ‘независна‘ судијка во некој предмет што се водел пред Кривичниот суд“, прашува таа
Поранешната министерка за внатрешни работи Гордана Јанкулоска во објава на Фејсбук реагира на вчерашното соопштение од Социјалдемократскиот сојуз (СДСМ) во врска со нејзината апликација пред Европскиот суд за човекови права (ЕСЧП) во Стразбур.
СДСМ смета дека обидите на Јанкулоска да се претстави себеси како дел од „судените во Нирнбершките процеси“ се единствено и само потсвесни, од аспект на тоа што тие процеси биле насочени против нацистите и злосторниците од тогашната нацистичка Германија.
Јанкулоска прашува зошто во СДСМ се наоѓаат засегнати и повикани за коментар за нејзината апликација пред ЕПСЧ, освен ако, како што вели, предметите не се суделе кај нив во партискиот штаб.
Според партиската реакција, додава, изгледа дека сепак случајот таму се судел.
„Зошто во СДСМ би се нашле засегнати и повикани за коментар за апликација пред ЕПЧС во која се бара да се утврди повреда на правото за правично судење која ја сторила некоја ‘независна‘ судијка во некој предмет што се водел пред Кривичниот суд, небаре предметот се судел кај нив во штаб? Ама, според реакцијава, сепак таму се судел“,
напиша таа на Фејсбук.
Во однос на апликацијата пред ЕСЧП, СДСМ истакнува дека станува збор за правен механизам што секој граѓанин има право да го искористи и оти формалното дозволување на апликацијата е само чекор кој претставува утврдување дека се исполнети процесните услови.
„Судот во оваа фаза утврдува исклучиво формални елементи: дали се исцрпени домашните правни лекови, дали постои статус на жртва, дали е почитуван рокот и дали апликацијата е компатибилна со Конвенцијата. Тоа е стандардна процедура, дефинирана во член 35 од Европската конвенција за човекови права“,
велат од партијата.
Оттаму додаваат дека во оваа фаза не е потребно ниту етички ниту правно основано да се коментира материјалната суштина на предметот бидејќи таа постапка сè уште не е ни започната.
„Едно е јасно и останува длабоко врежано во сеќавањето на граѓаните: Гордана Јанкулоска, која денес се претставува како жртва, беше дел од системот што години наназад ги кршеше човековите права на секој граѓанин на оваа држава“,
пишува во соопштението.
Партијата ја обвинува Јанкулоска дека како министерка овозможувала масовно прислушување, изборен инженеринг, политичка репресија и брутална злоупотреба на институциите во корист на ВМРО-ДПМНЕ и Никола Груевски.
Во интервју за МИА, Јанкулоска вели дека судењето против неа за случајот „Тенк“ било фарса и го спореди со Нирнбершките процеси и судењата за време на Информбирото.
Таа деновиве повторно се најде во фокусот на јавноста откако соопшти дека Европскиот суд за човекови права (ЕСЧП) во Стразбур отворил постапка по нејзината жалба за предметот „Тенк“.
Ексминистерката Јанкулоска за случајот „Тенк“, односно за набавката на блиндираниот „мерцедес“ од 600 000 евра за потребите на државата првостепено беше осудена во 2018 година, а четиригодишната затворска казна почна да ја издржува од септември 2020 година откако пресудата стана правосилна.
По две години и еден месец, таа на 1 ноември 2023 година излезе од затвор откако Апелацискиот суд во Скопје ја уважи нејзината молба за условен отпуст од натамошно издржување на затворската казна.