Со вкалкулирањето на попустот што го дава компанијата ОКТА, дизелот од полноќ ќе се продава по цена од 95 денари за литар, а бензинот БС-95 за 81,50 денари за литар
Од РКЕ велат дека во одлуката за определување на малопродажните цени на нафтените деривати се вклучени повластената стапка на ДДВ од 10 отсто (освен за мазутот) и намалените износи на акцизите за дизелските фракции од четири денари за литар и од два денари за бензинските фракции
Од ноќеска на полноќ дел од горивата ќе се продаваат по нови цени.
Според одлуката на Регулаторната комисија за енергетика (РКЕ), цената на бензинот БС-95 се намалува за 0,50 денари за литар. Цената на бензинот БС-98, пак, не се менува, односно останува на исто ниво како што била утврдена со одлуката од 30 март годинава.
Од полноќ дизелот ќе се продава поскапо за 2,5 денари за литар.
Па така, од полноќ новата цена на бензинот БС-95 ќе биде 83,50 денари за литар, бензинот БС-98 ќе се продава за 85,50 денари, а дизелот ќе чини 98 денари за литар.
Со одлуката на РКЕ, од полноќ за три денари поскапува екстралесното масло за домаќинство и тоа ќе се продава за 95,50 денари за литар. За 0,901 денари за килограм се зголемува цената на мазутот кој со одлуката на РКЕ од полноќ ќе се продава за 51,311 денари за килограм.
Од РКЕ велат дека во одлуката за определување на малопродажните цени на нафтените деривати се вклучени повластената стапка на ДДВ од 10 отсто (освен за мазутот) и намалените износи на акцизите за дизелските фракции од четири денари за литар и од два денари за бензинските фракции.
Комисијата им укажува на нафтените компании да продолжат со постојната пракса и да го вкалкулираат обезбедениот попуст од страна на Владата со главниот добавувач ОКТА и да ги намалат малопродажните цени за три денари за дизел и два денари за литар за бензините.
Според РКЕ, доколку не се продолжело времетраењето на намаленото ДДВ и не се интервенирало во акцизата, цената на бензините ќе била повисока за 8,50 денари за литар, а дизелот за 12 денари за литар во однос на денешната одлука.
Денеска од компанијата ОКТА информираа дека наместо до 6 април, попустот за горивата ќе трае до крајот на месецот, односно до 30 април.
Со вкалкулирањето на попустот што го дава компанијата ОКТА, дизелот од полноќ ќе се продава по цена од 95 денари за литар, а бензинот БС-95 за 81,50 денари за литар.