МНР очекува до средината на следната недела да бидат евакуирани сите македонски државјани кои изразиле подготвеност за враќање од земјите од Блискиот Исток
Од недела почнува евакуацијата на македонските државјани од земјите од Блискиот Исток со комерцијални чартер-летови, соопшти Министерството за надворешни работи и надворешна трговија откако попладнево бил склучен договор со авиокомпанија која ќе ги врши летовите.
Договорот, како што посочуваат од МНР, е склучен согласно Законот за јавни набавки, по спроведената постапка за набавка на чартер-летови. Постапката е спроведена по скратен рок, предвиден во ситуации како актуелната.
„Согласно утврдениот план и предвидената динамика, се очекува до средината на следната недела да бидат евакуирани сите македонски државјани кои изразиле подготвеност за враќање. Процесот е целосно координиран од МНР и ДКП во регионот. Техничките и организациските детали околу реализацијата на летовите ќе бидат утврдени во координација со економскиот оператор, за што граѓаните ќе бидат навремено информирани“,
соопштија вечерва од Министерството за надворешни работи и надворешна трговија.
Заклучно до денеска, Амбасадата во Доха ја контактирале 150 македонски државјани, од кои 95 изразиле подготвеност за евакуација, амбасадата во Абу Даби ја контактирале вкупно 585 лица кои престојуваат во Обединетите Арапски Емирати, како и 36 лица од Кувајт, 15 од Бахреин и пет од Кралството Саудиска Арабија.
„Сите македонски државјани кои сè уште не стапиле во контакт со надлежните дипломатско-конзуларни претставништва, а имаат потреба од евакуација или асистенција, тоа да го сторат во најкраток можен рок преку дежурните телефонски броеви на ДКП-ата или преку СОС-бројот на Министерството“,
повикаа од МНР.
Шест македонски државјани вчера со владиниот авион беа евакуирани од Израел преку Египет во Скопје.