СДСМ го повикува директорот на Агенцијата за национална безбедност (АНБ), Бојан Христовски, да ги декласифицира документите за наводно следење на премиерот
Очигледен е стравот кај премиерот Христијан Мицкоски од објавување на содржината на материјалите што треба да го докажат наводното негово следење од страна на службите, рече на денешната прес-конференција, насловена како „Вистината за АНБ“, портпаролката на опозицискиот Социјалдемократски сојуз (СДСМ), Богданка Кузеска.
Посочи дека со вчерашната изјава тој потврди оти нема никаква намера да ги декласифицира документите што би ги докажале неговите наводи дека нелегално бил следен.
Кузеска упати неколку прашања до премиерот во насока каква содржина содржат тие документи, поради што тој одбива да бидат декласифицирани.
„Ако СДСМ прислушувала како што тврди власта, зошто се плаши да ги декласифицира документите. Што во тие документи толку многу го плаши премиерот? Дали овие документи содржат докази за соработка на Мицкоски со странски непријателски служби? Дали тој работел на штета на интересите на државата за странски пари? Дали имал комуникација со руски агентури што финансирале екстремизам и дестабилизација на државата? Дали документите содржат наводи за нелегално финансисрање на партијата ВМРО-ДПМНЕ повзано со случајот ‘Делчевски ниви‘?“,
праша Кузеска.
Според неа, ако Мицкоски се плаши од декласификација на документите, СДСМ го повикува директорот на Агенцијата за национална безбедност (АНБ), Бојан Христовски, да го стори тоа и интересот на државата да го стави пред тој на партијата.
Премиерот Христијан Мицкоски во вчерашниот говор на прославата по повод 8 Септември – Денот на независноста посочи дека не е прашање дали ќе се декласифицираат материјалите, зашто според него, тоа е сосема ирелевантно.
На таквите повици рече дека гледа како на страв и паника, но и како изговор за дефокусирање на јавноста од вистинските дилеми.
„Вистинското прашање е како да ги спречиме злоупотребите и повеќе ова да не се повтори. Тоа ќе се случи само кога ќе има одговорност. А одговорност мора да има“,
кажа тој.
Посочи дека овој случај ќе го следат одблизу, најави дека во периодот што следува ќе се одмотува овој Гордиев јазол.
Изминатите денови владејачката ВМРО-ДПМНЕ и опозицискиот СДСМ разменуваат жестоки меѓусебни обвинувања, откако премиерот и актуелниот директор на Агенцијата за национална беезбедност (АНБ), Бојан Христовски, минатата недела потврдија дека е доставена документација до Обвинителството за гонење организиран криминал и корупција за наводни злоупотреби во Агенцијата во периодот од 2019 до 2024 година.
Поранешениот директор на Агенцијата за национална безбедност (АНБ), Виктор Димовски, во интервју за „360 степени“, тврди дека немало следење на лидерот на ВМРО-ДПМНЕ.
„Тврдам дека немало никаква документација што се однесува на прислушување и следење на поранешниот лидер на опозицијата, а доколку такво нешто постои, немаше да има потреба од ништо од ова што се случува, од овој циркус во парламентот, немаше потреба можеби и оваа емисија да ја имаме, ако одлучеа на едноставен начин да се декласифицира документацијата и да се објави“,
рече тој.