Со заем од 70 милиони евра од Европската банка за обнова и развој, Град Скопје ја почнува постапката за воведување „Бас рапид транзит“. Тендерот за јавна набавка за првата фаза се очекува да биде распишан летово, а најдоцна до 2024-2025 година новиот брз автобуски превоз би се пуштил во употреба. Со потпишувањето на договорот за заем, официјално почнува процедурата за изградба на брз и одржлив јавен транспорт, чија цел е намалување на сообраќајниот метеж, но и намалување на аерозагадувањето, најави градоначалникот Петре Шилегов.
„Го остваруваме 40 години стариот сон на скопјани за трамвај, обезбедувајќи систем подобар од трамвајот, согласно условите што ги овозможува денешно Скопје. Горди сме што Скопје е првиот град на Балканот кој го воведува БРТ-системот. Добиваме брз, безбеден и одржлив јавен транспорт, кој ќе биде атрактивен и ќе овозможи намалување на сообраќајниот метеж и аерозагадувањето“,
најави градоначалникот Петре Шилегов.
Проектот опфаќа воспоставување две линии, со коридори од Ѓорче Петров до Ново Лисиче и од Бутел до Кисела Вода. Трасата од Ѓорче Петров до Ново Лисиче ќе биде во должина од 12,8 километри во една насока, ќе има 21 станица, два терминала во индустриската зона во Ѓорче Петров и во населбата Ново Лисиче, каде што ќе биде изграден новиот терминал.
„Во оваа и во следните години ќе инвестираме во проекти, кои ќе придонесат за заштита на животната средина, ќе го олеснат транспортот, ќе придонесат за заштеда на време и енергетски ресурси, ќе овозможат раст на инвестициите и економскиот раст, како и нови работни места и ќе донесат подобрување на квалитетот на живот на нашите граѓани“,
изјави министерот за финансии Фатмир Бесими.
„Крајната цел на проектот е да се обезбеди нов градски превоз во Скопје, преку ефикасна и економска транспортна мрежа. Воведувањето еколошки автобуси ќе го намали загадувањето на воздухот и ќе обезбеди брз, безбеден и квалитетен превоз. Нашата улога е да обезбедиме современа инфраструктура и услуги, преку кои овој концепт на брз превоз ќе го подобри квалитетот на животот на граѓаните“,
рече министерот за транспорт и врски Благој Бочварски.
Според првичните проценки, вкупниот број на патници што ќе ја користат оваа траса е околу 65 илјади луѓе дневно. Времетраењето на патувањето од сегашните 70 минути би се намалило за повеќе од 50 проценти.